Kham lah ka karkhana Mawmluh, ban ia ka karkhana jngoh kai

Shillong:Ka shnong Maw mluh ha thain Sohra ka la bna nam namar ka jingdon ka karkhana pynmih dewbilat ba pawnam ha thain shatei lammihngi ka India, ka Mawmluh Che rra Cement Limited (MCCL).

Hynrei kane ka karkhana ka la tlot noh namar ka jingbym kitkhia ki briew kiba don ha ka sorkar namar ba kane ka dei ka karkhana kaba la seng ka sorkar naduh ka por ka sorkar Assam. Ka jingshong khlem treikam shuh kane ka karkhana la jan shiphew snem eiei, ka la wanrah ka jingkynjah jar ia ka shnong ka thaw namar ba ki nongtrei kila phet shnong lut bad kiba bun ki jaka sah jong ki nongtrei kila thylli bad sopniut lut, lait noh tang katto katne tylli kiba dang don briew.

Ha ka jingiakren bad ki nongshong shnong ka Mawluh, kila pynpaw ba ka karkhana jngohkai pyrthei ruh kam pat lah ban bsa ia ki nongshong shnong ka Mawmluh, kumba lah ka Mawmluh Cherra Cement Limited (MCCL).
Ha ka jingtwad jingtip na ki katto katne ki nongshong shnong, ki la pynpaw ba kumba ka long mynta, ban ianujor hapdeng ka karkhana MCCL bad ka karkhana jngohkai, ka dang kham lah ka MCCL wat la ka pynmih tdem, pynmih pum pum, hynrei ka ai ia ka kamai kajih ia ki paidbah naduh ki nongshong dukan, ki nongbylla, bad man ka sngi, ka shnong Mawmluh ka long kum ka iew bah, hynrei ha kine ki shiphew naduh ba ka MCCL kala troiñ, ka iew ki dukan ha shnong, ka die ka thied kala kynjah lut.

Katto katne ki longkmie, kila ong ba ki dukan, ka die ka thied ka thnem bha ha ka por ba iaid bha ka MCCL, hynrei mynta, naduh ba la sangeh treikam ka MCCL, la kynjah ka iew ka hat, baroh ki nongtrei kila krad lut sha la ki shnong namar ba ka karkhana MCCL ka la khang noh bad ki jaka sah ne quarter kila bun ba thylli lait noh kiba sah ki para shnong kiba sah ha katei ka quarter ka MCCL.
“Ka kam jngohkai ka shu ai kam tang ia kiba la heh spah, kiba lah ban shna iing basa (homestay), hynrei ki paidbah kim ioh jingmyntoi”, la ong ka kong Darisuk Syiemlieh bad kumjuh ka kong Rihunkni Rajee.

Kine ki longkmie kila iathuh ba haduh mynta kim pat ioh sngew ba ioh jingmyntoi na ka kam jngohkai, ban ianujor bad ka jingmyntoi ka MCCL. Kila ong ba watla ka MCCL ka pynmih pum pum hynrei ka ai jingai myntoi lut ia baroh ki nongshong shnong hynrei ka karkhana jngohkai pat kam pat lah ban ai kam ia ki paidbah lait noh tang ia ki katto katne kiba kham don kham em kum ki homestay, winestore, kiba leit ap camp site.
Kila ong ba ki nongjngohkai kiba nabar, ki shu wan iaid kai bad thied tang kawei ka um dih bad ka bam ki wanrah nabar, bad ki shu bret plastik ban khar ma ki nongtrei.

Kumjuh iwei ka kong Battilang Kharnaior ka la ong ba ka kam jngohkai ruh ka la sdang ban kiew watla kam pat dei haduh katta katta hynrei ka shongshit bha ka iew ka hat ha ka por ba dang thnem bha ka jingtreikam ka karkhana MCCL. “Ka kam jngohkai ka la sdang ban kiew ha kaba ka don ki jaka jngohkai, ki jaka sah, bad la don ki samla ka shnong kiba ioh kam”, la ong ka Kong Battilang.
Ka la bynrap, “Ha ka por ba ka MCCL ka dang iaid bha, ki nongshong shnong kiba trei kiba ktah ki biang ka tulop, ha shnong ha thaw ruh ka jingioh jingkot ka biang hynrei hadien ba la khang, ka jingioh jingkot kala duna”.