Kham kyrmen jop ka BJP na Mairang

Shillong, 02 Naiwieng:
Ka BJP ka la ong ba ka don hapdeng ka jingmyrmen ban jop ha kiba bun ki jaka ha kane ka elekshon MDC shiteng samoi ha ki 7 tylli ki konstwensi, khamtam na Laban-Mawprem, Mairang namar ba ki la don bun bha ki dkhot ka party ha kine ki jaka.
Ha ka jingiakren bad u President ka BJP u Bah Shibun Lyngdoh u la ong, “Ngi la don jingkyrmen ban jop lut namar ba baroh ki konstitwensi, ngi la don ki dkhot palat 3 hajat ngut eiei”.
U la ong ba na Mairang lei, hynne ka sngi ruh, ki nongkyrshan jong kiwei ki party kum na UDP, Congress bad na HSPDP ki la wan ban iasoh bad ka BJP ha ka thain Nongkhlaw.
“Ngi don jingkyrmen bha na Mairang, na Laban-Mawprem, War East bad wat na Nongkrem ruh namar ba ki paidbah ki la sdang ban sngewthuh ia ka nongrim ka BJP ban wan iasoh bad kyrshan ia ki kyrtong jong ngi”, u la ong.
Katkum ka jingong u Bah Shibun, ha ka jingshisha ka party, ka la sngew don jingkyrmen ban jop na baroh 7 tylli ki jaka bad ka jingsngew skhem ka long namar ba ki dkhot ha man ki konstitwensi kim duna ia ka lai hajar ngut nalor ki paidbah ba shu wan ban kyrshan ia ki kyrtong jong ka seng.
Lah ban kdew ba ka BJP ka la pynieng ha baroh hynniew tylli ki konstitwensi ha kane ka elekshon MDC shiteng samoi ba kynthupu Bah Hubert Marbaniang na Laban-Mawprem, ka Kong Mamiry Nongkhlaw na Nongkrem, Bah Kyntiewborlang Syiemlieh na Nongspung-Sohiong, Bah Counsellor Singh Wahlang na Nongkhlaw- Mairang, Bah Thandarsing Warjri na Pariong-Mawthadraishan, u Bah Denestar Pariong na Rambrai-Jyrngam kiba hap ha KHADC bad u Bah Kmenlang Kyndait na 7 War-East constituency kaba hap ha ka JHADC.