Kha khun ka tnga ha surok, ba kyntait ka nos ban pdiang ha PHC

Kawei ka longkmie, ka la kha khun ha surok, namar ba ka la shah beh noh na Runkata Primary Health Center (PHC), da ka nos kaba dei peit ia katei ka hospital ha katei ka por bad ka daw, ka long namar ba u tnga jongka, um lah satia ban siew bai sha ia katei ka nos.
U Shyam Singh, u tnga jong ka Naina Devi, kiba shong ba sah ha Lakhanpur ha ka shnong Runkata jong ka Agra, u iathuh ba ula leit ialam ia ka tnga jongu, ha ka por 7baje mynstep sha katei ka PHC bad ka nos, ka Sarita Singh ka dawa bai sha na u, na ka bynta ban pynrung ia ka tnga jongu, ha katei ka Centre.
Namar ba um don pisa ban siew ia ka nos, kumta, katei ka nongsuh khun, ka la shah beh noh bad haba ula ong ia ka, ba kan wad ambulance lem ruh ruh, hynrei ka la phah ba un phone hi dalade bad ba un ap ia katei ka ambulance.
U Dr Mukesh Vatsa, uba dei u doktor uba peit ia katei ka Agra, u iathuh ha ka india today, ba la beh kam noh ia katei ka nos, namar ka jing kyntait jongka ban pdiang ia katei ka thei suhkhun.