Kem umphniang sharak be-ain

Shillong,21 Iaiong:
Ka Dorbar shnong Khlieh Tyrshi, West Jaintia Hills ka la ioh ban kurup umphniang sharak be-ain da ki spah litar na ka kong Merit Shylla kaba shong ba sah ha Mukhla bad ka ne ka jingjia ka la jia ha ka 17 tarik mynta u bnai ha ka por 8:30 baje mynstep. Haba la tohkit na ka kong Merit ka Dorbar Shnong ka la lap ba ka kong Merit ka la ioh ia katei ka umphniang na ka kong Arlin Dkhar na Moopylaitsyiar (Khliehtyrshi) kaba la wan ban tyrwa da ka kali Sumo ML 04 A 4983 (Maxi Cap) ha ka dor 32 tyngka shi litter.
Hadien ba la wad jingtip shaphang katei ka umphniang sharak ka Dorbar Shnong ka la ioh jingtip ba ka kong Arlin ka la lum la lang ia kitei ki umphniang lyngba ki paidbah ba ioh card Rashon na Moopylaitsyiar Center (Khliehtyrshi), hadien ka jingpynlang wei pa wei ka sa iaid ban die ia ki.
Ka Dorbar shnong ka la pynkhreh ruh ban ujor da ka FIR pyrshah ia ka kong Arlin namarba ka la kynnoh ba ka kong Arlin ka dei ruh ka briew kaba la do bun ki jingthohbria bada ka dei ruh kaba ju kam ialde kum ka President ka JYF Women’s Wing.