Kem nongiarap lehnoh ha Shallang

Nongstoin, 19 Risaw:
Ki pulit jong ka West Khasi Hills District, myn ha ka sngi saitjain jong ka taiew ba la lah ki la ioh ban kem noh ia ar ngut ki snar kiba ju don kti ban iarap ia ki kynhun kaikhlaw kiba la pait na ka AMEF kynhun kaikhlaw na ka thain Garo bad ia kitei ki ar ngut ba la kem la tip kyrteng kum u Mana Sangma 27 snem na Songsak B bad ia u wei pat u ba dei u khasi la tip kyrteng kum u Anthony Puwein 40 snem u ba na ka thain Shallang.Shuh shuh ka khubor na ki pulit la iathuh ruh ba kitei ki ar ngut ki dei ruh kiba don kti ban iarap ha ka kam rah bor ia u wei u nongdie dawai pharmacy ha Shallang u ba la tip kyrteng kum u Akbar Alli bad u ba dei ruh u nongtrei jong ka Holy Family Hospital ha Rongjeng.
Ia u Mana Sangma ki pulit kila ioh ban kem ha ka por 9: 45 mynstep kumba 5 KM na Shallang u ba dang wan na Assam sha Shallang da ka Maruti Van katba u ia u Anthony pat ki pulit ki la ioh ban kem na ka iew Shallang.U Mana Sangma u dei ruh u wei u snar u ba la shah kem teng ha ki pulit ha ki snem ba la lah namar ka jingdon kti ha ki kam thied tiar siat, bad ki pulit ki suba ruh ba u Mana ha ryngkat ki kato katne ki parlok jong u don ki don ka jingthmu ban seng ia ka kynhun lehnoh kaba thymmai ha ki thain Shallang, hynrei katei ka jingthmu kala pulom noh namar ka jingioh ban kem noh da ki pulit ka WKHD.Na ka liang jong ki pulit kin dang pynlong ia ka jingtohkit khnang ban lap ksai ia kiwei pat ki runar kiba donkti ha katei ka kam, bad ia ka jingthmu ba rieh jong kitei ki runar.