Kem naphang ia ki samla, la kum ha Kashmir:HNLC

Shillong, 12 Jylliew:

Ka HNLC, ha ka jing pynmih khubor mynta ka sngi, ka kynnoh ba ki pulit jong ka Jylla, ki beh thong tyngeh bad kem naphang ia ki samla KSU ha kine ki sngi bad la beh ia kitei ki samla, la kumba beh ia ki dkhot jong ki seng ehrang, ha kaba la kem da kaba shu antad, ong katei ka kyrwoh. Ka HNLC, ka ong ba ka jingiakhih ILP, ka dei kaba la khlieh da ki 13 tylli ki seng, hynrei mynta la pynlong langknia tang ia ka KSU marwei bad ki bor District, ki nang pynkhluit ia ka jing ia khih, da kaba kem ia ki samla.

Ka HNLC, ka ong ba ki samla ha kine ki sngi, ki hap ban phet rieh ialade sha khlaw ne ba kin hap ban leit rieh sha kiwei pat ki Jylla ba marjan bad ka jinglong jingman, kam iapher shuh satia, na kaba jia ha Kashmir, ong ka HNLC.

Ka HNLC, lyngba U bah Sainkupar Nongtraw, Publicity Secretery jongka, ka ong ba haduh mynta ki dang jia, tang ki Petrol bom, hynrei lada jia ba ka HNLC, ka ai ba ki samla kin pynbthei da ki bom IED, ka Jylla baroh kawei kan kem ding, ong ka kyrwoh. Ka HNLC, ka kren biang, ba ka kwah ia ka jingsuk bad dawa ruh ba dei ban pyllait noh mar mar ia U President jong ka North Khasi Hills District, U Bah Ferdynald Kharkamni bad kumjuh ia U Bah Sonstar Nongkhlaw nalor kiwei pat.

Ka HNLC, ka phah ruh ia ka khubor sngewlem jongka, halor ka jingkhlad noh U SS Khaplang, uba la khlad ha Myanmar bad uba dei uwei na kiba ia khun tyngeh, ba ki Naga, kin ioh ia ka jinglaitluid.