Kem ki pulit ka Shallang, ia u snar ka GNLA

Nongstoin, 14 Nailur:
Mynta ka janmiet, ki bor pulit ka Shallang Police Station, ki la ioh ban kem noh ia u wei u briew u ba ju don kti ban iarap ia ka kynhun kai khlaw na Garo ka ba la tip kum ka GNLA. Ia u tei u briew ba la kem noh da ki pulit la tip kyrteng kum u Bostik M Sangma 28 snem ka rta.
Kat kum ka khubor na u Superintendent of Police ka WKHD, bah S. Nongtnger u la iathuh ba u tei Bostik u dei ruh u khun jong u Bolly M Marak u ba na ka Shnong Awek, kaba dang hap hapoh ka Shallang PS, u tei u runar u la ju don kti bun bha ha ki kam iarap ia katei ka kynhun kaikhlaw GNLA, bad u la iarap ruh ia katei ka kynhun la bun bun snem.
Shuh shuh u la ong ruh ba katkum ka jingioh jingtip kaba tikna na ki nongsyntiat ba stad jong ki pulit, ki pulit ka Shallang PS kila ioh ban kem noh ia u tei u briew na kawei ka jaka ha ka Shnong Rongjeng, la register case ruh pyrshah ia u tei u runar ha Shallang PS bad ka jingtohkit kan dang iaid sha khmat.