Kem ki pulit ka Shallang, ia u snar GNLA

Nongstoin, 18 Iaiong:
Ki pulit ka Shallang hapoh ka ka jingialam jong u Circle Inspector u bah D. Mawlein mynta ka step phyrngab, ki la bteng biang ban leit khynra lehnoh ha ka thain Dymmit ka shnong kaba dang hap hapoh ka jingpeit jong ka Shallang Police Station West Khasi Hills District.
Ka khubor na u heh pulit jong ka District u bah S. Nongtnger u la iathuh ba ha katei ka jingleit khynra lehnoh ki pulit kila ioh ruh ban kem ia u wei u snar ka GNLA na kawei na ki jaka jong katei ka shnong, bad ia utei u snar ka GNLA bala ioh kem da ki pulit la tip kyrteng kum u Koltha Sangma 45 snem ka arta na ka shnong Dymmit – B.
Shuh shuh u tei u heh pulit u la iathuh ruh ba na ka jaka bala ioh ban kem ia u tei i snar ka GNLA la ioh ruh ban kurup ia shibun tylli ki tiar ialeh jong katei ka kynhun kiba kynthup ia saw tylli ki cartridges case jong ka suloi SBBl kiba la thylli, kawei ka cattridge case jong ka 303 rifle kiba thylli, ar tylli ki rods kiba ia syriem bad ki tiar pyndonkam ia u bom IEDs ba ju pyndonkam da ka GNLA, ar tylli ki mobile phones bad kawei ka sim card.