Kem ki pulit ka Shallang ia u ehrang ka GNLA

Nongstoin, 13 Iaiong:
Na ka bynta ban iakhun tyngeh ban rat dyngkhong ia ki kam pyntriem bad ia ki kynhun kaikhlaw kiba ju shong rieh tngen ha ki thain Shallang, mynta ka sngi ki pulit ka Shalang kila bteng biang ban pynlong ka jingkhynra lehnoh kaba jur bha ha ki thain Shallang bad Rongkhugre.
Katkum ka khubor na u heh pulit jong ka District la ong ba katei ka jingkhynra lehnoh jong ki pulit ka Shallang mynta ka sngi ka long halor ka jingioh jingtip kaba tikna na ki nongsyntiat ba ki kynhun kaikhlaw ka GNLA ki don ha katei ka thain.
Shuh shuh u la ong ruh ba ha katei ka jingleit khynra ki pulit ka Shallang kila ioh ban kem noh ia u wei u ehrang ka GNLA u ba la tip kum u Arjen N Marak u ba na ka shnong Nengju WKHD.
Na ka liang jong ki pulit kin dang bteng ruh ban pynlong ia ka jingtohkit khnang ban lap ksai shuh shuh sa ia kiwei pat.