Nongstoiñ, 15 ’lyngkot:
Watla ka thain Shallang ha kine ki khyndiat bnai, ba la leit ka la don ha pdeng jong ka jingshong suk, hynrei ki pulit kim shym la shong kli kti bad khein sting, hynrei ki la iai bteng ban peitngor bha ia katei ka thain khnang ban wanrah ia ka shong suk shong shngain.
Ka jingiai lah ban peitngor ki pulit ka Shallang kala pynlong ruh ia ki ar ngut ki nongiarap jong ka kynhun kieng atiar na ri lum Garo ka Garo National Liberation Army (GNLA) ban ngat noh ha ka kti jong ki pulit ka Shallang, ha shwa ba kin iohlad ban leh bad bteng ia ki kam pyntriem ha katei ka thain.
U bah SP ka West Khasi Hills, U bah S. Nongtnger haba kren bad u nongthoh khubor u la iathuh ba ia ki tei ki ar ngut ki nongiarap jong ka GNLA la ioh ban kem noh da pulit ka Shallang ha ka sngi thohdieng jong taiew ba la lah na ka wei na ki jaka ha Shallang West Khasi Hills District.
Shuh shuh u bah Nongtnger u la iathuh ruh ba ia kitei ki ar ngut kiba la ioh kem la tip kyrteng kum Hedik R Sangma 40 snem ka rta u ba dei ruh na ka shnong Riangdim, katba ia u wei pat la tip kyrteng kum u Hubert R Sangma 35 snem ka arta na ka shnong Songsak.
Ia ki tei ki ar ngut kiba la shah kem ki pulit ki la dep ban phah sha kashari bad haduh mynta ka jingkhynra jong ki pulit ia ki dkhot ka GNLA ha ka thain Shallang la nang pynkhlain bad pynjur bha, ong biang u bah Nongtnger.
Phi don ban ong eiei?