Kem ki pulit ka Assam, ia 3 ngut ki nongtuh kali na Meghalaya

Guwahati:Ki pulit jong ka jylla Assam ki la ioh ban kem ia 3 ngut ki briew kiba la suba donkti ban pyniaid iew ia ki kali kaba ki ju tuh ha ka jylla Assam bad Meghalaya.

Hynnin ka miet jong ka 10 tarik u Jylliew 2021, ha kaba iadei bad ka jingjia kaba la jia ha Dudhnoi lyngba ka case kaba la registar hapoh ka Police Station No 65 /21 u/s 120(b)/413/468 /476/379/411 IPC, ka kynhun jong ki pulit Assam hapoh ka jingialam jong u DySP(HQ) Goalpara bad u SI Sumit Talukder ki la pynlong ia ka jingthwet ha ki katto katne tylli ki jaka kiba don hapoh ki thaiñ jong ka Rajabala Outpost bad Phulbari Police Station jong ka West Garo Hills, Meghalaya.

Ha katei ka jingthwet la lap ia kawei ka thuk thuk kaba la shah tuh bad kawei ka kali Bolero Pickup na kitei ki kynhun nongtuh kali.
Ia u nongialam jong katei ka kynhun tuh kali la tip kyrteng kum u Noor Alam, u ba ju lum ia ki kali kiba la tuh na ka Jylla Asam bad die pat sha kiwei. Sa uwei pat u ba la suba donkti ha katei ka kam u dei u ba la tip kyrteng kum u Rashidur Mandal, u ba long ruh u nongiarap jong u Noor Alam bad u dei ruh u ba la thied ia katei ka kali Bolero pickup kaba la tuh.