Jowai: Hadien ka jingioh kem bad kurup ki pulit WJH ia u Drug na ki ar tylli ki kali Scorpio bad la iohkem haduh 8 ngut kiba suba donkti, ha u bnai ba la dep; myn hynnin ka sngi pat la ioh kem biang sa ia ar ngut ki paralok jong kitei ki nongkhaii drok da ka kynhun Anti Narcotic Task Force hapoh ka jingialam u SI A. Wahlang ba ka kynhun jong u.
Kitei kiba shah kem ki kynthup ia u Shah Alam Majumdar, 32 snem uba dei ruh u Vice-President Ward Commissioner No.6 bad u Gulab Wajid uba ju sin ruh kum u Tinku, kiba dei ki nongshong shnong jong ka Natun Ramnagar Part IV, Dakshin Silchar, Cachar District.
Kitei ki arngut ki la wan sha Jowai na ka bynta ban iarap ia kitei ki 8 ngut kiba la shah kem da kaba pyrshang ban pyniarap ioh jamin ia ki. Na kitei ki ar ngut la ioh kurup ruh ia kawei ka kali Maruti Wagon R kaba ym don satia ia u No. bad ruh kam don ia ki kot ki sla kiba biang.
Kitei ki ar ngut ki dei ki ba iatrei lang bad kitei ki ba la shah kem na ka bynta ban pyniaid iew ia u Drok uba la wanrung sha poh India lyngba ka Myanmar, la ong u SP ka WJH u bah Vivek Syiem.
Ia kitei ki ar ngut yn sa ialam ia ki sha ka iing bishar bad na ka liang ki pulit kin sa pan bor na ka iing bishar ban tohkit bniah ia ki.