Jowai: Ki pulit ka West Jaintia Hills, myn hynnin ka step synia ha ka por kumba 2:30 eiei ki la iohkem ia ar ngut ki lehnoh Manipur ba kynthup ia u Chairman jong ka Zeliangrong United Front uba la tip kyrteng kum u Raitu Chawang (66) bad u Information Secretary jong ka, u GengchungPou Namthuyang (43) uba khot sin kum u Dangmei.
Haba iakren bad u SP ka West Jaintia Hills, u bah Vivek Syiem u la iathuh ba hadien ba u la ioh ia ka jingtip kaba tikna ba kitei ki heh nongialam katei ka seng kin iaid lynti na Silchar sha Gauhati lyngba ka Meghalaya, ki la pynlong ia ka jingtalasi ia ki kali bad ha kane ka jingtalasi, la iohkem ia kitei ki ar ngut na kawei ka Night Super Bus kaba na Assam.
Ia kitei ki arngut la leit rah sha iing bishar ha kaba na ka liang ka iing bishar ka la phah ia ki sha Jail tad haduh ba u ki pulit na Manipur kin wan ban shimti ia ki.
Ki pulit kim shym la ioh kurup eiei na ki hynrei ki la ioh tang ia ki saw tylli ki Mobile Phone.