Kem ki pulit Jorabat ia 2 ngut, kurup shibun u Ganja, uba shongdor haduh T. 15 klur

Nongpoh: Ki pulit ka jylla Assam lyngba ka Jorabat Police Outpost, hynnin ka step, ki la ioh ban kurup shibun u Ganja na kawei ka trok kaba don ia u number HR-38T-2913, ka trok kaba kit ia u Ganja na Manipur, da ka jingthmu ban pynpoi sha Nongbah Guwahati.

Ki tyllong khubor, ki iathuh ba kitei ki Pulit Jorabat Police Outpost, ki la ioh ban kurup haduh 2500 kilo u Ganja na ka jylla Manipur, ha kaba la ong ba ki la lap haduh 32 tylli ki jingsong, ia kaba la thep lang bad u Sying, kaba ki nongkhaii Ganja, ki la thep bha hapoh katei ka trok. Haba ki pulit ki la pynshongdor ia utei u Ganja, la ong ba u la shongdor kumba T. 15 klur, kaba la thep hapoh katei ka trok kaba mih na Manipur bad kaba la thmu ban pynpoi sha Guwahati.

Halor katei ka jingiohkem ia ki Ganja na katei ka trok, ki pulit ki la kem noh ia angut ki rangbah, kiba kynthup ia u Ashok Kumar na Haryana bad u Bhupendra Singh na ka jylla Uttarakhand.