Kem ki pulit, ia uba soi tuh da ka saiñ u DC

Shillong, 16 Risaw:
Mynta ka sngi ki pulit ki la ioh kem ia uwei u briew uba la ju soi tuh da ka saiñ u Deputy Commissioner bad la ngeit ruh ba u dei uba ju mlien ban soi tuh da ka saiñ ki briew ha kiba bun ba ki kam lehtuh jong u. Utei u briew uba la shah kem u dei uba la tip kyrteng kum u Manas Joshi uba sah ha Dispur Guwahati bad uba dei ruh u trai jong ka M Star Company ha Guwahati. La kem ia u najan ka MES kaba don ha Rhino Point, Shillong hadien ba la ioh jingtip ba u mut ban phet krad sha Guwahati.
Katkum ka jingiathu u SP City bah Vivek Syiem, u la ong ba u Manas Joshi u la aplai ban pynlong ia ka Fashion Showha Shillong ha u risaw, 2015 bad ha kajuh ka por la phah shithi ia u da u DC ha kaba la ai bor katkum ki kyndon kiba la batai . Hynrei la lap ba ia ka soi u DC la soi tuh hi da utei u briew ryngkat ki jingpyndap ia ka nombar jong ka shithi ba u la saiñ. Ki pulit ki la suba ba utei u briew u dei uba la lehtuh ia kiba bun ngut ki paidbah bad ki la kyrpad ia ki briew kiba la shah thok ba kin mih shakhmat ban ai ka jingujor jong ki pyrshah ia u.