Hynnin ka sngi, ki pulit ki la kem ia U Jai Kishore, uba dei u manager jong ka CCL International Limited bad ka daw ka long namar ba u pynslem than ban shna pynbha ia ka surok National Highway 62. La kem da ki pulit ia U Kishore, na Tura hynnin ka sngi. Ka CCL, ka dei ka kompeni, kaba shimti ban maramot ia ka surok National Highway 62.
La kem ia U Kishore, hadien ka jing ujor jong ki briew na Baghmara, ba ka jing maramot ia katei ka surok ka la suki palat, ha kaba katei ka surok, ka dei kawei na kiba sniew tam ha katei ka thain.
Ka NH 62, ka dei ka surok kaba donkam bha bad kaba iaid na Duhdnoi ha Assam bad ka bteng sha Karonggre ha West Garo Hills. Ka CCL, ka dei kawei na ki 4 tylli ki kompeni kiba trei ia katei ka surok NH 62. 3ngut ki kontraktor, ki la sdang ban trei ia la ka jong ka kam, katba ka CCL kam shym la sdang satia haduh ha kine ki sngi.
Ka CCL, ka don shibun ki jingtrei surok ha Garo Hills, kaba kynthup ruh ia ka jing pyntrei ia ki skhim jong ka jingstad German, ong ka khubor.