Kem ki pulit ia ki nongkhaii pisa thok na Pliingkatta

Shillong, 20 Jylliew:
Ka kynhun ki pulit mynta ka janmiet ka la iohkem ia ka kynhun jong saw ngut ki briew kiba la suba ba ki dei ki nongpyniaid ba radbah ia ki pisa thok ha ka jylla. Ki pulit ki la pynlong ka jing khynra ba kyrpang hapoh ka jingialam u sub Inspector Anthony Khongsit hadien ka jingioh jingtip bad ki la leit khynra ia ka jaka shong kitei ki nong pyniaid pisa thok ha Pillingkata, ka jaka kaba don ha khappud Assam.
Na katei ka jingkhynra ryngkat bad ki pulit ka Pillingkata kawei ka kynthei bad lai ngut ki shynrang ki la shah kem noh ha ki bor pulit bad la wan ialam noh sha Nongpoh Police Station. Kitei kiba shah kem ki kynthup ia ka kong Sheela Marbaniang na Lawsohtun, Jafferson Lakiang na Lawjynrew, u Nirbhay Rabha na Kamrup Assam bad u Samsul Ali na North Kamrup.
Ar tylli ki kali la ioh ban kurup na katei ka jaka bad 8 tylli ki mobile phone. Nalor kitei la ioh kurup ruh u wei u bilor ba don kynja dawai ba long rong blue- jyrngam, ba kawei ka kynja kot (liminated paper) kaba imat dei ka kot kaba pyndonkam ban shna pisa thok. Ki khubor ki iathuh ruh ba imat donkam ban sait da katei ka kynja dawai lane jingkhleh ban shna ia ka pisa thok, nalor kitei la ioh ruh ban kurup kawei ka synduk rit kaba la suba ba la thep ia ki pisa thok.