Nongpoh: Saw ngut ki briew kiba kam ialade ba ki dei ki dkhot jong kawei ka kynhun sengbhalang kaba la tip kum ka Hynniewtrep National United Federation (HNUF), ki la shah kem noh ha ki Pulit Ri Bhoi bad ka jingshah kem jong ki, ka dei hadien ba ki la leit ban dawa pisa na kawei ka Dhaba ha Ri Bhoi, ha ka kyrteng ban pynmih pisa na bynta ka seng.
Ki Pulit Ri Bhoi lyngba ka kynhun ba kyrpang, haba ki la ioh ka jingtip kaba biang halor katei ka jingthmu leit lum pisa, ki la pynlong ia ka jingpeitngor bad peit pyrman bha bad kaba la pynlong syndon ia ki Pulit, ba kin iohkem ha ka por ba ki 3 ngut ki la thmu ban shim pisa na u Manager jong ka Dhaba bad kiba kem ha ka por 2 baje eiei mynsngi.
Haba la ioh ban kem ia kitei ki 3 ngut bad kiba la tip kyrteng kum u Simon Jyrwa,u Alton Wahlang bad u Francis Wahlang, kumta ha ka jingtohkit ki Pulit na kitei kiba la shah kem, ki la phla ha ki Pulit, ba ia katei ka kam la phah da uwei u briew uba la tip kyrteng kum u Rangsngur Warjri, uba kam ialade ba u dei u President ka Meghalaya People Federation (MPF) bad kumjuh ruh kum u President ka HNUF.
Ia u Rangsngur Warjri, ki Pulit ki la kem na Umsning, kata ka dei katkum ka jingiathuh da kiba kiba la shah kem nyngkong, ha ka por ba ki thmu ban leit shim pisa na kawei na ki Dhaba ha Ri Bhoi.
Haba iadei bad katei ka jingjia shah dawa pisa ka Dhaba, u trai bad u Manager, kim shym la nud ba ujor ejahar pyrshah ia kitei ki nongleit dawa pisa na ka Dhaba jong ki, namar ki don jingsheptieng ba ki dei ki khynnah Khasi bad ruh ban leit ka shah pynthut ia ki kam hapoh ka Dhaba.
Kumta haba iadei bad katei ka jingshah kem kitei ki 3 ngut bad ia utei u nongbthah, kumta halor ki sakhi satar kiba biang, ki Pulit ki la ujor da ka Suo moto case bad kiba la dep ban rejister ha Nongpoh Police Station, ka jingtohkit halor katei ka jingjia kan dang iaid shakhmat.
Phi don ban ong eiei?