Kem ki Pulit Byrnihat ia ki bateri ba la tuh na Meghalaya bad kiba la thmu pynpoi sha Assam

Nongpoh: Ki pulit ka Byrnihat Police Outpost, ki la ioh ban kem ia kawei ka Mahindra Pick-up, kaba la kit shi kali ki bateri kaba la suba jur ba ki dei ki bateri tuh na kawei ka jaka kaba don ha ki thain 15mer, Byrnihat, Ri Bhoi.

Katei ka jingioh kem ia katei ka Mahindra Pick-up, ka la jia ha ka 1 tarik mynta u bnai, ha kaba la ong ba ki Pulit Byrnihat, ki la ioh jingtip ba la don kawei ka Mahindra Pick-up, kaba la kit shi kali ki bateri, ia kaba la suba jur ba ki lah ban dei ki bateri shu tuh. Haba la ioh ia katei ka jingtip, ba la don kawei ka Mahindra kaba la kit ia kitei ki bateri kaba mih na Shillong ban leit sha Guwahati, ki pulit ka Byrnihat, ki la pynlong ia ka jingpynap shrimp ha Byrnihat, hynrei la ong ba katei ka Mahindra, ka la lait ban phet na ka jaka ap ki pulit. Kumta haba ki pulit ki la tip ba katei ka Mahindra ka la lait phet, ki la pynshang ban leit wad ha kylleng ki jaka ka thain Byrnihat.

Ha ka jingwad shitom ki Pulit, ki la lap ia katei ka Mahindra Pick-up kaba la kit ia kitei ki bateri, ha kaba ki la lap ruh ba ia kitei ki bateri la thmu ban thep noh sha kawei pat ka Mahindra Pick-up. Tang mar ia lap ia katei ka Mahindra Pick-up, kaba la kit ia kitei ki bateri, ki pulit ki la pyrshang ba kylli ba ki wan ban kit na kano ka jaka bad ruh ki la pyrshang ban pan ia ki kot ki sla, hynrei haba ki la lap ba kim lah ban pyni ia ki kot ki sla, ka la pynlong ia ki Pulit ka Byrnihat ba kin kem noh ia briew kiba suba donkti ha katei ka kam bad ban rah noh ia kitei ki kali sha thanad Byrnihat.