“Kem ia kiba shoh ia ka Kong Angelbeth”

Shillong, 24 Risaw:
Ka jingialang jong ki briew mynta ka sngi hapoh ka jingialam lynti ka Kong Angela Rngad ki la dawa ba dei ban kem mardor ia kito ki briew kiba ktah kti bad shoh ia ka kong Agelbeth Lyngdoh Nongpiur kaba la jia dang shen.
Ha kane ka jing ialang kaba la khot kyrpang ban iakren ia kane ka kam mynta ka sngi, ha Hall ka Bethany Society, Shillong, la wan ban iashim bynta da ki riew kynthei, ki seng, ki samla, ki paralok bad kiba ieid ba thoin jong ka Kong Agelbeth, pastor, phadar bad sistar ruh, ki la pynrem jur ia ki briew kiba thad ia ka Kong Angebeth ha ki lad sam khubor (social media) da ka jingthmu ban ialam bakla ia ka jingmut jingpyrkhat jong ki paidbah.
Ka jingialang ka la rai ban leit iakynduh ia u heh pulit u DGP ban dawa ba dei ban kem mardor ia kito ki briew kiba thad burom ia ka Kong Angel beth da kaba pynphriang lyngba ki lad sam khubor bad kiba shoh ba dat ia ka, kaba dei ka jingpynkhein ia ka hok briew man briew.
Ki la dawa ruh ba dei ban pynlait noh ia ka Kong Angelbeth, bad ban kem ia kiba ring video, upload ha ki social media. Nalor kane, ki pulit ki dei ban pynlong ia ka jingtohkit ia kane ka kam.
Ki la pynrem jur ia ki pulit kiba kem ia ka Kong Angelbeth khlem da pynlong shwa ia ka jingtohkit ban wad ia ka jingshisha hynrei ia kito kiba shoh ba dat bad ktah kti ia ka pat, ki khlem leh eiei bad kane ka dei ka jingshah shiliang bad ka jingpynkhein ia ka ain.
“Ka sorkar ka dei ban kitkhlieh ia kane ka jingjia namar ba ka dei ka jingpynkhein ia ka hok briew man briew”, la ong ka Kong Angela.
Ki nongkren ki la pynrem jur ia ka rukom pyrkhat jong ki briew da ka lynti bym dei tang ba la shu iohi ne ioh sngew iano iano khlem da wad ia ka jingshisha.
Lah ban kdew ba ka Kong Angelbeth ka la shah kem ha ka 15 tarik Risaw hadien ba ka la shah kynnoh ba ka la rahbor ia u Mohan Pegu sha Guwahati na iing sah jong u na Lumparing. Mynta ka Kong Angelbeth ka don ha phatok bad ka dang shah tohkit ha ki pulit.