Kem ia kiba pynlong kor shna pisa, na kaba tih dewiong, ong U Bah Bindo

Shillong:U bah Bindo M Lanong, u nongialam rangbah jong ka party UDP, u la pynpaw ba na ka liang jong ka sorkar jylla ka dei ban thung ia ka jingtohkit halor ka jingtih bad khaii dewiong beain ha ka jylla.
Haba ia kren bad ki lad pathai khubor, na ka liang u bah Lanong, u la ong ba ka dei ban don ka jingtohkit CBI lane ka official body na ka central bad ka jylla halor ka jingtih bad khaii dewiong beain ha ka jylla.

U la ong “La dei ban thung ka jingtohkit bad kem ia kine ki briew ki ba donkti ban pynlong ia ka kor shna pisa na ka jingtih bad khaii dewiong beain ha ka jylla”.
U la bynrap shuh shuh “Kiba donkti lang ha kane ka kam ki dei ki heh ki hain na baroh ki party khamtam kiheh ki hain ki ba don ha ka sorkar, kiba pyniaid ia ka sorkar hi ki dei ki ba pyniaid ia kane ka kor shna pisa”.

U bah Lanong u la ong “Nga la ioh jingtip bha ba ha ka por ba don ka jingkhangdam ki briew ki shah khang dam lut hynrei tang u dewiong u ba khlem shah pynjari ka jingkhangdam ha ka ba ka iaid shait shait”.
Haba kylli u bah Lanong u la ong “Ka party UDP kam kyrshan ia ka sorkar ban leh ia ki kam beain, hynrei ka kyrshan ia ka sorkar na ka bynta ba ka donkam ia ka sorkar ba kan don ha ka jylla”.

“Ngi kyrshan ia ka sorkar ha kaba ia dei bad ki mat jingeh ki ba bun bad na ka liang ka UDP kam ju kyrshan ia ka sorkar haba don ka jingiateh (deal) ha ki kam beain, ha ka ba ngi la pyneh ruh ia ki bun ki mat ki ba ym ia hap ha ka jylla ” u la bynrap.
U la ong “Nga sngew ka dei ban thung ia ka jingtohkit halor kane ka bynta bad kam don ka jingma ban ai ka jingdawa ia ka sorkar halor kane ka bynta”.