Shillong:Ki nongialam jong ki lai tylli ki sengbhalang, kiba kynthup ia ka KSU, FKJGP bad ka HNYF, ki dawa ia ka sorkar ba kan kem mardor ia kitei ki kharmetor kiba ktah kti ia ki lai ngut ki samla Khasi bad la ai por ba kin kem hapoh 24 kynta. Hynrei ha kajuh ka por la maham, ba lada kim nud satia ban kem ia kitei kiba ktah kti ia kitei ki samla, kumta ka sorkar kan hap kit khlieh hi, lada ka mih kano kano ka jingjia ba sngewsih hadien katei ka por ba la buh.
Ki khar Metor bad ki tiar pynmynsaw, ba ki rah ha ka por kowphiw, ha ka Sngi Thohdieng:Wlytan
Ha ka jingiakren bad ki nongthoh khubor mynta ka sngi, ki nongialam jong kitei ki lai seng, kiba kynthup ia U Bah Lambok Marngar, President ka KSU, U Bah Welbirth Rani, President ka FKJGP bad U bah Sadon Blah, President HNYF, ki la pynsngew ruh ba kaba kum kane ka jingjia kam shym la jia satia ha ka sien ba nyngkong, hynrei ka la ju jia ruh ha ki sien ba ladep, ha kaba ki Khasi, ki ju shah ktah kti ha kitei ki khar Metor. Kitei ki nongialam sengbhalang, ki ong shuh shuh ba ka jingdawa ban weng ia ki khar metor na katei ka jaka, kam dei shuh ha ka sien ba nyngkong, hynrei ka dei ka mat kaba la slem bha bad ki ong ruh ba katei ka jaka kam dei shuh hi ruh, ka jaka sah jong ki nongtrei Municipal, hynrei ka dei ka ktem jong ki nong pynkulmar shnong, ki nongshong poiwir bad kiwei de ki riew runar.
Ki nongialam sengbhalang, ki kyntait ruh ban leit sha ka jingialang ba la khot da U Deputy Commissioner, East Khasi Hills District, kaba la buh ha ka por 3baje janmiet, hynrei ki kwah ba ka sorkar kan pyni shwa da ki kam. Ki nongialam jong ki lai seng, ki ong ruh ba lada shah ktah kti ki dkhar, ki pulit ki stet bha ban kem ia ki Khasi, katba haba shah ktah kti ki Khasi, ki ju mlien ban pynpoi sha ka jingiabeit bad ia sngewthuh jingmut. Ki lai seng, ki dawa ruh ba dei ban siew bai lutksan ia kito kiba shah shoh bad kiba mynsaw ha ka jing ia kynad kaba naduh hynnin ka sngi.