Kem ia 2ngut ki khun U CM Jha, hukum ka Kashari

Shillong, 12 Nailur:
Ka tnad CID ka jyl la ka la ioh ia ka hukum ban kem ia ki ar ngut ki khun shynrang u CM Jha uba dei u heh ka CMJ university.
Kine ki ar ngut ki khun u Jha kiba shah thwet ha ki pulit ban kem hynrei kiba la phet rieh ki kynthup ia u Govind Jha uba dei u CMJ foundation secretary bad u Gopal Jha.
Ki pulit ha kane ka sngi Thohdieng ki la ia thuh ba ka Kashari ka lapynmih ia ka hukum ban kem ia ki bad la pynngat ha ka kyndon bym lah ban ioh jamin. Ia kane ka hukum la pynmih da u Chief Judicial Magistrate ha ka 4 tarik Nailar ba la dep halor ka jingkynnoh ba ki donkti ha ka bamsap ha CMJ university.
Shwa ia kane, ka tnad CID ka la ioh kurup T.11 lak ka pisa na iing sah jong u Jha, kynthup 50 tylli ki lut US 100 dollar bad saw tylli US 50 dollar.
Ka tnad CID ka jylla ki la aiti ia ka iing sah jong u Jha ha Crinoline ha Laban sha ka lok jongu Jha da ka jinghukum ba kam lah ban die ia katei ka iing shano shano hynrei ka lah tang ban shu shong hi.
U Jha u la shah kem ha ka 22 tarik Iaiong ha kane ka snem na shnong jongu na Bihar hadien ba la lap ba u la ai syrnod thok sha ki samla pule na CMJ University.
U Lat barim ka jylla u RS Mooshahary uba dei u Visitor kane ka skulbah u la ujor pyrshah da ka ejahar ia ka CMJ University bad u chancellor halor ka jingkynnoh ba ki ai syrnod thok sha ki spah ngut ki samla pule na kane ka skulbah.