Kem ding kynsan ka trok kit jri ha Mawsmai 10mer, julor da ki phew lak

Nongpoh: Kawei ka trok 12 shaka kaba don ia u number JK-02-CG-9975, ka la kem ding kynsan hynne ka step ha ka por 3 baje ei ei mynstep hapoh ka surokbah NH-37 Guwahati-Shillong, kaba don mar pyrshah bad ka School MonFord bad hap hapoh u pud u sam ka shnong Mawsmai 10mer, Ri Bhoi District.

Katei ka Trok, ka dei kaba kit shi trok ki Jri (Rubber), ha kaba la ong ba ka dei kaba mih na ka jylla Agartala, da ka jingthmu ban pynpoi sha ka jylla Uttarakhand, hynrei haba la poi ha katei ka jaka, khlem da tip ia ka daw tynrai, pynban katei ka trok, ka la kem ding kynsan bad kaba la wanrah ia ka jingjulor kaba khraw eh.

Ki la don ki kali pynlip, kiba la iabeh ban poi kloi sha katei ka jaka ba kem ding katei ka trok, hynrei namar ba kim poi shuh ha ka por kaba biang, kaba la pynlong ia ki ba kim lah shuh ban tehlakam bad ban pynlip ia katei ka ding.