Kem biang ki pulit CID, sa 4ngut kiba hiar thma ha Ichamati

Shillong:Ki pulit ka tnat Crime Investigation Department (CID) ka jylla Meghalaya mynta ka sngi ki la ioh ban kem sa 4 ngut ki briew ba don kti ban hiar thma ia ki dkhot ka Khasi Student Union (KSU) ha ka 28 tarik rymphang 2020 ha Ichamati. Ki briew ba shah kem ki kynthup ia u Deboraj Hajong 22 snem ka rta, u Sanjit Das 37 snem ka rta, u Shiba Dey 24 snem ka rta bad u Bimol Hajong 20 snem ka rta.

Kumban shu pynkynmaw ki paidhur bar jylla ha ka janmiet jong ka 28 tarik rymphang 2020 kila hiar thma ia ki dkhot ka KSU hadien ba wai ka jing ialang paidbah halor ka CAA 2019 bad ban dawa pyntreikam ILP hapoh ka jylla Meghalaya. Ha kane ka jing hiar thma uwei dkhot ka KSU u la khlad noh bad bun ngut ki dkhot ka KSU nalor ki paidbah ka thain Ichamati ki la mynsaw.

Lah ban ong ruh ba ki pulit ka tnat CID, ha ki por ba la dep ki la ioh ban kem ia kumba 8 ngut ki ba don kti hiar thma ha Ichamati.