Kem biang ia u dkhot ka UPRA na Rongjeng

Nongstoin, 27 Iaiong:
Hadien ba ki pulit ka WKHD ki la ioh ban kurup ia shibun ki tiar ialeh jong ka kynhun UPRA bad kem ruh ia ar ngut ki nongiarap, mynta ka sngi ki pulit ka Shallang ki la bteng biang ia ka jingkhynra ha ki thain Rongjeng khnang ban lap ksai shuh shuh ia ki dkhot jong katei ka kynhun kaikhlaw kaba thymmai.
Katei ka jingkhynra ki pulit ka Shallang ha Rongjeng ka long halor ka jingioh jingtip biang jong ki pulit ba don ki dkhot katei ka kunhun kiba dang shong bad rieh tngen ha ka thain Rongjeng bad ha katei ka jingkhynra ki pulit kila ioh ban kem noh sa ia uwei u dkhot u bala tip kum u Bilbil M Sangma u ba dei na katei hi ka shnong.
Na ka liang jong u SP ka WKH, bah S. Nongtnger u la iathuh ba ka jingtohkit ia utei u snar ka dang iaid sha khmat khnang ban dang lap shuh shuh sa ia kiwei pat kiba dang thmu ban leh ia ki kam pyntriem.