Shillong, 26 Naitung:
Hadien ba ki la ioh kem ia ki nongkhaii drok na jaka ieng kali ka Bethany Hospital ha kane ka sngi Hatmajai, mynta ka sngi ki pulit ki la ioh kem biang ia u nongkhaii drok bad kurup ia u drok na Nongkseh, Laimer, Shillong.
Kane ka la jia mynta ka sngi ha ka por 1:45 eiei janmiet ha kaba uwei u briew uba la donkti ha kane ka kam, u la shah kem ha ki pulit lyngba ka jingiatreilang bad ka shnong. Ia une u nongkhaii drok ba la tip kyrteng kum u Ridap Thangkhiew 27 snem uba dei na Nongkseh, Laimer la kem bad la ioh kurup ruh ia u drok 2 tin Golden ba khia 1.51 gram.
La ioh kurup ia une u drok na kawei ka kali Maruti Alto (ML05-M-1145) kaba dei trai kawei ka kynthei bad ruh ia ka pisa kaba T.4166.
Ki pulit ka Jhalupara Beat House ki la rah noh ia u sha thanat ban tohkit kham bniah ia une u briew.