KEIN NOH KA IAUMSNAM, DONKAM BAN IABEIT NOH KA MEGHALAYA BAD KA ASSAM

Ka jingiashoh iadat bad ka jingia-umsnam ha ki khap-pud Meghalaya bad Assam ka la iai-jia mynta la bun tylli ki snem tang namarba iaknieh khyndew ha ki khap-pud. Don ki jingiakajia bad ki jingiashoh iadat kiba tang para paidbah nongshongshnong(civilian) khap-pud bad ki la don ruh ki jingiashoh kiba donkti lang bad ki pulit, khamtam kiba na Assam. Ha baroh kine ki jingiashoh iadat kiba la duhnong ki dei na ka liang ka Meghalaya. Kane ka jingduhnong ka dei ba la duh noh ia ki mynsiem briew bad kumjuh ruh ka jingduhnong ia ki jaka ki puta. Ngim lah ban klet ia ka jingjia ha Langpih ha ka 14.5.2010 ha kaba 4 ngut ki Khasi ki la kyllon iap ha ki ktang suloi jong ki Pulit Assam ha Langpih na ka daw jong ka jingiakajia pud. Ngim lah ruh ban klet ba dei ha ka 14.2.2019 ba ki pulit Assam kiba don ha Langpih ki la thombor ia ki paidbah Khasi ha Umwali haduh ba bun ngut ki la mynsaw jur bad kumba san ngut ei ei ki la shah patom shah bom jem shaduh thanat (PoP) Langpih na Umwali. Ha jan baroh kine ki jingiakajia, kiba la paw bha sha khmat ki dei ki pulit jong ka Assam kiba don kti ban shoh bad dat briew lane beh briew lane byrngem byrsit briew ia ki nong-Meghalaya bad, namarba ym lah ban ialeh pyrshah ia ki pulit Assam, ka jingiamrem bad duhnong ka dei ha ka liang ki paidbah jong ka Meghalaya, la ka long ha Garo Hills, West Khasi Hills, Ri Bhoi ne Jaintia Hills. Kein noh kane ka jingiashoh iadat bad iaumsnam namar ki paidbah Meghalaya ki rem lynter bad duhnong lynter khait. Namar ym long ban ialeh pyrshah bad ka Assam. Ka daw balei ba la rem lynter namar ka sorkar Assam ka kitkhia bha halor u pud u sam bad ka pynheh ruh ia u pud u sam da kaba pyndonkam ia ki pulit bad ki CRP ban pynthikna ia kane. Katba ka sorkar Meghalaya pat ka iohthiah ngai ngai, kam salia satia halor u pud u sam lada duhnoh shibun ki shnong lane shibun ki jaka ruh. Nalorkata ka sorkar Meghalaya kam buh ia ki pulit ban iada ia la u jong u pud u sam bad haba ki paidbah nongshongshnong jong ka Meghalaya ki jynjar ha ki khap-pud ruh ka sorkar Meghalaya kam treh satia ban tur bak bak ban iarap ia ki. Ka iehnoh ia ki ha ka jingisynei jong ki pulit Assam. Kein noh la biang katto, la thait. Mynta la donkam kyrkieh noh ba ki arliang sorkar jylla kin iapynbeit noh kloi lan halor kane ka kam kaba la sahteng la 47 snem.

Na ka liang ki paidbah Khasi ki la iai-kyrsiew ia ka sorkar Meghalaya mynshuwa bad mynta ruh ba kan kitkhia ia ka kam kajia pud hynrei ka sorkar Meghalaya ka shu leh mynleh khie joit tang shipor arpor hynrei ka iohthiah biang lyngngai kynjai. Ki paidbah ha Nongstoin dang ha kane ka taiew ba la lah, ki la rah lama iong bad kynkiw ia  u Deputy Chief Minister jong ka sorkar Meghalaya ha ka por ba u la hiar shathie ban ialap MDC ilekshon na ka bynta u kyrtong NPP. Na ka liang ka KSU bad FKJGP ruh ki la ju pynkhihwin paidbah halor ka kam khap-pud hynrei maki ruh ki long kum u ksew kyndit ktang suloi. Ki kyndit thiah tang ha ka por ba la shah lehbein ne shah pyniap ki Khasi halor ka kam iakajia pud, hynrei hadien katto katne por ki ruh ki iohthiah biang. Ha kane ka kynti kawei na ki seng bhalang, ka HANM ruh ka la khie byrthen kum u lakyrwang haduh ba ka la pyni paidbah ia ka bor jong ka hajan Secretriat hynrei ngim tip ioh ba ma ka ruh ka khih khohreh tang mynta ba shah bom shah shoh ki Khasi ha Umwali hynrei ynda la dap taiew ne bnai, ka ruh ka lah ban klet noh. Ngi da lyngngoh ngain balei ki Khasi ki sngap jar jar ia kane ka jingshah lehbein lehkhoh ki para Khasi ha Langpih bad Umwali? Shano ki seng bapher bapher kiba kam ialade ba ki dei ki seng iada bad ieid jaitbynriew? Balei kim iakhih bad leh ei ei? Hato ki la iohthiah lut ne jem knap lut? Ia ka sorkar Meghalaya lei lei, khamtam kane ka sorkar MDA, ngim kwah shuh ban kren ne kdew ei ei namarba ka shu iohthiah sah. Mynta, kane ka sorkar MDA ka la kynjoh jan shisnem pura hynrei kam kitkhia ei ei namar wat tang shisien ruh kam pat tynruh ia ka sorkar Assam ban iabeit noh halor u pud u sam.

Ka kam iakajia pud hapdeng ka Meghalaya bad ka Assam ka la neh mynta la 47 snem kynthih. Ka jingiakajia pud ka don ha ki bun bynta jong ka Garo Hills ruh tangba kam da khluit kumba khluit ha Khasi bad Jaintia Hills. Nangta, ka jingiakajia pud hapdeng ka Assam bad Meghalaya ka don ha bun ki bynta jong ka West Khasi Hills khamtam ki thain jong ka Malangkona ter ter haduh markhap bad ka Hahim-Athiabari, Athiabari-Komphulduli-Hakumari-Langpih-haduh Kyrshai Area ruh. Nangta ter ter shaduh bun ki jaka jong ka Hima Nongspung-Hima Jirang kum ha Umtyrnga-Pillangkata-ter ter haduh Khanapara area. Nangta ka pur ter ter shaduh bun ki bynta kiba hap hapoh ka Hima Khyrim Ribhoi bad ka pur ter ter shaduh ka Block-I bad Block-II jong ka Jaintia Hills. Katkum ki katto katne ki jingthoh, ka Block I bad Block II ki heh kumba 1,544 sg.km. La kdew ba ki don kumba 143 tylli ki shnong tang ha ka Block I katba ha ka Block II pat ki don jin haduh 213 tylli ki shnong ha ka por ba la kad noh na Jaintia Hills ban pynhap hapoh ka Mikir Hills. Kiba hap hapoh ka Block I la kdew ruh ba ki don haduh 30 tylli ki shnong ba la pynhap hapoh Mikir Hill na Doloiship Nartiang, 71 tylli ki shnong kiba hap hapoh ka Mynriang Sirdarship ruh la pynhap hapoh Mikir Hills, na Nonglung Doloiship 1 shnong, na Nongjngi Doloiship 3 tylli ki shnong, na Jynthong Doloiship 2 tylli ki shnong, na Shiliang Myntang Doloiship 3 tylli, na Nongphyllut Doloiship 24 tylli ki shnong, na Raliang Doloiship 8 tylli ki shnong bad na Shangpung Doloiship 1 shnong. Nangta kiba hap hapoh Block II pat ki long na Nartiang Doloiship ki long 15 shnong, na Lalung Nonglung Doloiship ki don 60 shnong, na Mynriang Doloiship 56 tylli, na Nongjngi Doloiship 2 tylli, na Jynthong Doloiship 79 tylli bad na Nongphyllut Doloiship 1 shnong. Ia kine la pynhap hapoh ka Mikir Hills ha kito ki snem mynshuwa ba la kad na Jaintia Hills.

Haduh mynta, shibun ka um ka la tuid na Meghalaya sha Brahmaputra bad sha Bangladesh bad Bam of Bengal hynrei shano kata ka jingpynbeit pud hapdeng ka Meghalaya bad ka Assam? Shibun la iashoh iadat, shibun ruh la iap briew bad bunsien ruh la iakren hapdeng ki arliang mamla hynrei kaei ka jingmih ha kaba iadei bad ka jingiapynbeit pud hapdeng kine ar? Ym pat mih soh i ei ruh. Kaba donkam kyrkieh mynta ka long ba ki arliang sorkar ki dei ban shong iakren pynbeit noh ia u pud u sam bad ka jingiakren ruh ka dei ban long kaba kut noh. Ka bha ban don ka jingiabeit lang baroh arliang. Kaba dei ban ai noh sha ka Assam ruh dei ban ai bad kaba dei ban noh sha ka Meghalaya ruh dei ban ioh noh, ym donkam shuh ban pynslem, namar la ngiah bad la thait, katto la biang.