Shillong,14 Naitung: Katba nangiaid ki sngi ka ishu surok Uranium ha South West Khasi Hills ka la nangkhluit nangkhluit ha kaba ki la mih ar tylli ki kynhun ban pynksan ia la ka nongrim ba ki ieng. Kawei ka kynhun ka dei kaba kwah ban tih ia ka surok 2 Lane bad kawei pat ka dei kaba pyrshah ia katei ka surok 2 Lane na Nongstoiñ-Wahkaji-Mawthabah. Mynta ka sngi kitei ki ar kynhun na South West ki la kiew Shillong ha kaba ka kynhun kaba kwah surok kaba la tip kum ka joint Action Committee on Two Lane Road Nongstoiñ-Mawthabah ka la leit ia kynduh ia u CEM ka KHADC ban pynbor ba ka dei ban ai NOC na ka bynta ban shna ia katei ka surok.
Katei ka kynhun hapoh ka jingialam u Ricky Sohlang kum u Chairman haba ia kren bad ki nongthohkhubor mynta ka sngi u la ong ba ki la leit ban ia kynduh ia u CEM, bah Pynshngaiñ N Syiem kumjuh ruh ia u chairman ka komiti kyrpang ka KHADC ban bishar bniah ia katei ka kam u bah Hadrian Lyngdoh. U bah Ricky uba dei ruh u President jong ka Hynniewtrep Achik National Council (HANC) u la ong ba ha katei ka jingiakynduh ki nongialam ka kynhun kaba u ialam ki la kren shai ha ka KHADC ba ka nongrim ka KHADc ka la shai kdar ba kan ym ailad ban tih Uranium, kumta kila kyrpad na u ba u dei ban ai NOC noh pat ia ka surok na bynta ka ri ka par katei ka thaiñ.
Ha katei ka jingiakynduh u la ong ba u CEM u la pyntip sha ki ba lashai ne la shisngiun her noh sha Delhi bad u bah Hadrian ban pan jingshai na ka Minitry of Road Transport halor ka jingthmu ban shna ia katei ka surok. Katkum ka jingiathuh ki nongialam katei ka JAC ba kynthup ia u Vice President u bah Stelin Thongni,u Asstn.Scy u C.Khardewsaw bad u bah W.Lyngdoh Sangriang u Lyngdoh ka kur Lyngdoh Sangriang ki la ong ba ka tnad MoRTH kan shong jingialang lashai ka sngi ka 15 tarik u naitung ban ia shong pyrkhat ban rah noh ia katei ka projek Wahkaji sha kiwei pat ki jaka namar ka jingpynslem palat ban ioh NOC ha Wahkaji. Ia katei ka jingthmu ka tnad surok ban rahnoh shawei ki la ong ba ki la ioh jingtip hadien ka jingiakynduh jong ki ia u Secretary katei ka tnad u Sanjay Mitra bad ia u Chief Engineer ka National Highway North East Zone u B.K Rajawat.
Ki la pyntip ba ha kaba ia dei bad katei ka surok ka sorkar ka la pyndep ia la ka jong ka kamram jong ka lyngba ka tnad PWD hynrei kaba sah mynta ka long beit sa tang ka NOC na ka District Council. Shuh shuh ki la pyntip ba kin ap haduh ban da ioh jingtip na u CEM hadien ba u la wanphai Delhi namarba u la kular ha ki ba un sa phone tang shu ioh jingtip na Delhi,hynrei lada jia ba kim ioh jubab kin pynbeit da ka tarik ban ia kynduh biang ia u bad katei ka lah ban long khyndiat lane shibun ngut.
Ka jingkren ki nongialam ka JAC, ba pyrshah surok 2 Lane
Tang mar ia dep kren ki nongialam katei ka JAC ba kwah surok 2 Lane, la wan sa ka kynhun kaba pyrshah kaba la tip kum ka Joint Action Committee of Social Organisation ( JACSO) kaba la ialam da u bah Wallambok Syiemiong Chairman bad u bah Robertjune Kharjahrin, Secretary. Ha ka jingiakren bad ki nongthohkhubor u bah Wallambok Syiemiong u la ong ba mynta ka sngi katei ka JAC ka la pynher lai tylli ki shithi, kawei sha u myntri rangbah ka jylla u Dr.Mukul Sangma,kawei sha ka ministry of Road Transport and Higway, ( lyngba ka tnad PWD ka sorkar jylla) ban dawa ba ka dei ban pyndam noh ia ka jingthmu ban shna ia ka surok 2 Lane bad kawei pat sha u Shri P.N Sarkar General Manager (Open Pit) (Lyngba u Chairman bad Managing Director UCIL), Meghalaya ban pynpaw ba ki pyrshah ia ka jingkhot Tender katei ka seng ban trei ia ki kam bapher bapher jong ka UCIL ha South West Khasi Hills.
U bah Syiemiong u la ong ruh ba katei ka JAC ka pyrshah ia ka jingthmu ban shan da ka surok 2 Lane namarba ka dei ka surok kaba thmu beit thik ban tih Uranium katba u la tyrwa pat ban shna ia ak surok Single Lane na Nongstoiñ-Ranikor-Phlangdiloin. U bah Robert Kharjahrin haba batai ia ka nongrim ba katei ka JAC ka ieng u la ong ba katei ka kynhun kam kwah shuh ban dang jia biang ha kane ka jylla kumba la jia ha ki snem 2948 ha kaba la shu phah soi jubor ia ka IOA bad u la ong ba ka dei hok ia ka sorkar ban pan jingbti na ka KHADC haba ka thmu ban shim jaka hangno hangno ha ka jaka ba hap hapoh ka jingpeit ia ka KHADC bad ym dei ba kan shu klun jubor.
Utei u Secretary ka JAC u la ong ruh ba u kwah ba ka MoRTH kan pynshai paidbah lyngba ki jingpynbna paidbah kaei ka jingthmu ba ki wanrah da ka surok 2 Lane ha Mawthabah. U la pynkynmaw ba ha ka 16 tarik kan don ka jingialang paidbah ha Mawkyrwat ha ka por 11 baje mynstep ban pynshai paidbah ha kaba ia dei bad katei ka surok bad kumjuh ruh ka jingkhot Tender ka UCIL ban tei ia ki kam pynroi ha katei ka thaiñ.
Phi don ban ong eiei?