Kaweh lama kali U Mukul, ia ki kali kynwiaw

Shillong, 15 Nailur:
U myntri rangbah ka jylla u Dr.Mukul Sangma mynta ka sngi u la pyllait paidbah ia ka Citizen Portal under Crime & Criminal Tracking Network & Systems (CCTNS) projek bad u la kaweh lama ruh ia ka kali kynwiaw ki pulit ka nongbah Shillong ne ka Highway Patrols ha ryngkat ka jingiadonlang u myntri kam pohing ka sorkar jylla u bah HDR Lyngdoh. Kiwei pat kiba la don lang ha katei ka sngi ki long u Chief Secretary ka jylla u K.S.Kropha, Director-General, NCRB, New Delhi, Radhakrishna Kini, DGP, Meghalaya S.B.Singh bad kiwei pat ki heh pulit.
Ka CCTNS ka dei ka projek ba ka sorkar ka la buh na ka bynta ban pynsuk ia ki paidbah kumno ban pynpoi ia ka jing ujor jong ki lane ban phah jingtip lyngba ka internet lane ba kin lah ban pynbeit bha ia ka jingujor jong ki tang lyngba ka internet. Ia katei ka projek yn pyniar shuh shuh kumno ban lah ban pynshisha ia ki nongshongwai, ki Passport,ki jingai jingbit ban iaid proseshon bad kiwei pat da kaba phah sha ka website http://citizenportal.meghpol.nic.in/.
Ka kali kynwiaw pat ne ka Highway Patrols Vehicles ka dei ban pynkhlain ia ki pulit pahara ha kylleng ka nongbah Shillong. Ia katei ka kali la mang 6 tylli na bynta ka ri Lum Garo bad 6 tylli pat na bynta ka ri lum Khasi bad Jaintia. Haba kren ha katei ka jingialang u Dr.Mukul Sangma u la ong ba kane ka juk mynta ka dei ka juk ka jingdawa ki teknoloji, kumta hap ban iaid ryngkat kumba ka long ka pyrthei mynta.