Kawang juti ia u heh BJP ha Delhi, katba u dang kren sha ki kotkhubor

U Dr.Shakti Bhargava, u kawang juti mynta ka sngi, ia U  GVL Narasimha Rao, u nongkren jong ka BJP ha New Delhi, ha ka por ba u dang kren sha ki kotkhubor. U Bhargava, la iathuh ba ialade ruh, ula shah talasi ha ki briew jong ka tnat  Income Tax department, halor ka jingthied jaka puta, ka jingbuhrieh pisa bad kiwei.

U Shakti Bhargava, u dei u nongpeit ia ka  Bhargava Hospital bad ula kawang juti, ia U GVL Narasimha Rao, ha ka por ba u dang kren sha ki kotkhubor ban iada ba ka Sadhvi Pragya, kaba donkti ha ka jingbthei bom ha Malegaon, ka la pyniasoh ialade sha ka seng BJP bad ba kan iakhun ia ka elekshon na Bhopal, pyrshah ia U  Digvijaya Singh, uba dei u kandidet jong ka seng Congress.

Ki lad khubor ki iathuh ba U  Shakti Bhargava, ula thied lai tylli ki iing bad ula siew T.11.5klur na ka account jongu, ha kaba u thied bad ai kyrteng ha ka tnga jongu, ha ki khun bad kiba ha iing.

Ha ka jingtohkit, la iathuh ba ha u snem 2018, ha ka jingwad jingtip da ka tnat Income Tax ha  Lucknow, Kanpur bad ha Varanasi ha ki jaka jong U  Bhargava, la lap ia ka pisa kaba T.28lak bad ka ksiar kaba T.50lak. Ha ka jingtohkit, um shym lah ban pynshai ba kumno u thied ia ki iing kiba shongdor T.10klur. La iathuh shuh shuh ba ka tnat Income Tax, ka lap ruh ia kiwei pat ki phra tylli ki kompeni, kiba la pyniaid da U Bhargava, kiba um shym la iathuh ia ka tnat lum khajna jong ka sorkar India. La ju tip ba U  Shakti Bhargava, u dei uba pyrshah bha ia U Narendra Modi bad u ju thoh ia ki jingthoh pyrshah ha ka peij jongu ha facebook.