Katto katne shaphang U Ma Singh Mulieh

(Da u ma M.M.Thaiang)

U Ma Singh Mulieh uba long teng u MLA ka Jowai Assembly Constituency u la khlad syndet ha ïingsah jong u ha Iongpiah, Jowai hynne ka step ha ka por kumba 5 baje eiei mynstep. Ia ka met ba dangsah jong u la rah sha ïingkur sha shnong Ialong bad ka jingleit on thang kan long ha ka 12 tarik Jymmang (May) 2022. Iathuh kiba ha iing jong u ma Singh Mulieh ba ka jinglehniam kan sdang kumba 10 baje eiei mynstep.

Ban iatip lang katto katne shaphang u ma Singh Mulieh. U ma Singh Mulieh u dei u khun uba lai na ki sawngut ki khun jong u Woh (L) Son Dhar bad ka Men (L) Lakhi Mulieh. Kat kum ka jingiathuh jong kiba ha iing la ong ba la kha ia u ha u bnai February 1949 ha shnong Ialong.

Ki kmie ki kpa ki la phah skul ia u naduh dangrit ha Moolang Lower Primary School Ialong. Hadien ba u la pyndep ia ka jingpule Lower Primary School ha Ialong, u bteng ia ka jingpule Midle English (M.E.School) ha Mission M.E. School Jowai bad bteng ia ka jingpule High School (Secondary School) ha Marianhill High School Jowai bad ia ka Post Graduate (Bachelor of Art) na St.Edmund’s College, Shillong.

Ha shwa ba un paw pyrthei bad iashim bynta ha ka kam Sainhima Sima (Politic) u la long u Nonghikai skul kumba saw snem eiei (1975-78) ha Marianhill High School Jowai. Ha ka juh ka por ha kine ki snem u la long uwei na ki Nongseng jong ka Sengbhalang ha Jowai, ia kaba la tip kum ka Jaintia Youth Welfare Association bad u long u President uba nyngkong jong kane ka Association.

Ha ka snem 1978, u la ia khun ia ka kam MDC ban mihkhmat sha ka ïingdorbar thaw-ain jong ka Jaintia Hills Autonomous District Council na ka Jowai North MDC Constituency da ka Tiket Hills State People Democratic Party (HSPDP) bad u la jop. U la jop MDC saw samoi (term) lynter. Ha kaba nyngkong u jop na ka Tiket HSPDP bad ha ki lai term pat u jop da ka Tiket United Democratic Party (UDP). Ha kine ki snem ka jinglong MDC jong u, u la long ruh u Chief Executive Member (CEM) jong ka Jaintia Hills Autonomous District Council.

Ha ka snem 2003 u la iakhun ia ka MLA na ka Jowai Assembly Constituency bad u la jop. U la long ruh u Myntri Cabinet (State Minister) bad bat ia ka tnat sorkar ba dei peit ia ka PHE, Industries Etc. Nalor ka kam kum u Nongmihkhmat paidbah (MDC & MLA) u bat ruh ia kam President ka Sein Raij Ialong. U ma Singh Mulieh u long u briew uba ieid ia ka jingnang jingstad bad u long uwei na ki Nongseng ia ka skul ki sawshnong kata Mihmyntdu, Ialong, Sabah, Umlarpang (MISU) M.E. School ha Mihmyntdu bad hadien ba la kyntiew ia kane ka school sha ka kyrdan Secondary School la tip ia kane ka Skul kum ka Mihmyntdu Secondary School, Mihmyntdu.

U ma (L) Singh Mulieh u long ruh u briew uba ieid bad sngewtynnat ia ka Sport & Games bad u la long uwei na ki Nongialehkai football jong ka shnong Ialong. Ka jingkhlad syndet jong u ma Singh Mulieh ka long ka jingduh ym tang ia ka iing ka sem (Khun), ka iing ka sem (Kur) ia ka shnong ka thaw ka long ruh ka jingduh ia ka Ri Jaintia, ia ka State bad ia ka Jaidbynriew hi baroh kawei. Wat lada u ma Singh Mulieh um don shuh, hynrei ki “MATTI” jong u ki paw tyngkrein bad ki sah kynmaw pateng la pateng.