Katno ka dor u briew?

AIS SUJA

Katno ka dor u briew? Kane ka long ka jingkylli kaba khraw ha kine ki sngi shaphang ka dor u briew bad ka jingim briew.

Ha kine ki sngi ngi iohi kumba ka jingim briew kam don dor eiei, khamrem dor u mrad pynban, ka im ka iap uno uno u briew I kumba u briew um don dor eiei, kumba ong ki ba ong, iap dep, im rep. ka mut lada u briew u iap u la dep (finished) hynrei lada u dang im u hap ban rep ban trei ban ktah hangne ha pyrthei. I kumba u briew ruh u hap ha ka kyrdan mrad? Kane ka long kaei kaei kaba bakla shaphang u briew.

U briew u don ka dor kaba rem, (uno uno u briew) ka dor briew kamdei ka dor mrad. Ka dor briew kamdei tang da ki spah ki hajar ne phew hajar bad kumta ter ter. Ka dor briew ka long kaba rem tam na ki jingthaw jong u Blei hangne ha pyrthei. Hynrei kaba sngewsih ka long la niew ia ka dor u briew kaba poh dor tam ha kine ki sngi, bad kata ka jingshisha ka paw tyngkreng.

Don ki khep kiba u briew dalade ialade, um sngewthuh ia ka dor ka jingim jong u da kaba pynjot noh ialade ha ki bun ki jingkwah brai ka jingim, khamtam lei haba u briew u poi ha ka kut lad ka jingim u kloi ban shim noh iala ka jingim (suicide). Balei? Namar um sngewthuh iala ka dor ka jingim briew jong u hangne ha sla pyrthei. Sa kawei pat u briew ia la u para briew umdon jingsngew synei shuh para briew, namar ka jingiatiplem (conscience) ka la sdang ban duh noh namar ba la tap ka ieit tang ialade. Biang ka jong nga, kiwei mat iadep shato.

U briew, um dei u mrad ba ngi ioh ban leh katba mon. Mynta lei wat u mrad ruh ymioh ban leh mon u don la ka dor ha kane ka pyrthei. Balei ka long kumta? Dei namar ba u Blei u la kren kein, ba u briew u don la ka dor bad u ba kordor tam na ki jingthaw u Blei baroh. Ka dor u briew ka long kaba rem katta kata, kampher la u iong u lieh u saw u stem, long niam aiu ruh, u Blei um peit ia kata hynrei ia ka mynsiem u briew kaba iajan bad u Blei. U Blei u khlem wan sha ka pyrthei ban pynrem ia u briew, hynrei ban pynim bad ai jingim ia u. Ioanis 3:17. Namar u Blei um khmih kumba khmih ma ngi ki briew. 1 samuel 16:7.

Kumta, u briew u don ka dor kaba rem ha khmat u Blei, bad u Blei u ong kumne – “Ngan pynkham kordor ia u briew ban ia ka ksiar ba la phrang, ia u briew kein ban ia ka ksiar ba nylla ka ophir. Isaiah 13:12. Kumta ka long kaba shyrkhei lada u briew un pynjot ialade, u Blei un pynjot ia u. lada uno uno u pynjot ia u para briew, ka jingbitar u Blei kam lap ia u. Genesis 1:15/ 1Korinrth 3:17. Kumta ia kaei kaba u Blei u la kren hangne, un leh ruh kumta. Isaiah 46:11. Ka ktien u Blei ka ong shaphang u briew kumne – “Namar la thied ia phi (ia ubriew) da ka dorbah (da ka snam): Te namar kata to pyndon burom ia u Blei ha ka met bad mynsiem jong phi, kiba long ki jong u Blei. 1 Korinth 6:20. La thied ia u briew da u Blei na ki kti u soitan. U Blei u la siew ia u soitan da ka dor k a snam u khun jong u (U Jisu khrist) namar u Blei u niewkor eh ia u BRIEW. Haduh ba u hap ban siew da ka bor bah ka snam u Jisu Khrist u khun u Blei.

Balei u Blei u leh haduh katne? Dei namar ba u ieit eh ia u briew. Ioanis 3:16 kumta u briew u long u ba kordor u ba remdor ha khmat u Blei. Ka dor briew kamdei ka batad hei ho kynmaw ka dor ka jingim briew ka long kaba rem. Ka mynsiem briew kaba kordor. Wat lehkai ia la ka jingim u briew u don la ka dor kaba ymlah ban siew lait noh tang u Blei hi marwei. Namar kata ko BRIEW to pyndon burom ia u Blei ha ki met ki mynsiem jong phi. 1 Korinth 6:20. Amen.