Katba dang niew ia ki metiap, na ka jingkylla ka rel, kynrup u nongiap na khohwah jong u nongtrei

Ka long ka jingjia, kaba sngewngiew sat, haba u briew, uba iap, u leit kynrup ia ka khohwah jong u nonglum met iap bad katei ka dei ka jingjia, kaba la jia, na ka jingkylla jong ka rel ha Odisha.

U Robin Naiya, u dei uba la khein iap, na ka jingkylla jong ka rel ha ka sngi thohdieng ba ladep bad la buh ia ka met iap jongu, ha kawei ka skul ha Balasore jong ka Odisha.

Haba ki nonglum met iap, ki la leit rung sha katei ka skul ban niew ia ki met iap, hynrei U Robin, ula kynrup trait na khohwah jong uwei na ki nongniew met iap bad mar kumta, ula hylla, da kaba ong “Ngam pat shym la iap satia, sngewbha ai um ianga” ong U Robin, uba don 35 snem ka rta.

Katei ka sur, na U Robin, ka la pynkhie niuhrih ia ki briew kiba don ha katei ka kamra, hynrei, haba ki peit bha, ki iohi, ba u dang im bad kumta, ki la leit rah ia u mar mar sha Hospital.

U Robin Naiya, u dei uba na ka shnong Charnekhali, jong ka North 24 Parganas ha West Bengal bad ki kjat jongu, baroh ar tylli ki la dkut, hynrei, um shym la iap satia. Ka tnat rep, mynta ka sngi, ka ai jingkhein, ba baroh kiba iap, ki long 278ngut, hadien ba ki don kiba iap shuh sa 3ngut, ha ki jaka sumar.

U Robin Naiya, ha ryngkat bad 7ngut kiwei pat, ki mih na la shnong, da ka jingthmu ban leit bylla sha Andhra Pradesh bad ki leit da ka Coromandel Express.