Kat kum ka work order, la dei ban dep mynta u bnai ia ka surok Dawki, yn ieng ka khyrdop lum pisa ha Madan Lyntad, ong ka NHIDCL

Shillong:Halor ka jing pyntrei ia ka surok bah Shillong Dawki, na ka liang jong U Rupang, ula pan jingtip, lyngba ka RTI, na ka ophis jong U Secretary PWD, Meghalaya; hynrei kaba lyngngoh, ka long ba katei ka tnat kam lah satia ban ai jubab bad ka la aiti sha ka National Highways & Infrastructure Deve lopment Corpo ration Ltd (NHIDCL), Shil long, ba kan jubab.

Ka NHIDCL, haba jubab ia ka jingkylli, ka iathuh, ba ka jingtrei pynheh ia ka surok na Shillong sha Tamabil, ka la sdang naduh U Noh prah 2020 (lait noh ka Pynursla Bypass) bad la iathuh ba ka jinglut pisa, na bynta katei ka surok, ka poi sha ka T.1,606.52klur (khlem da khein ia ka Pynursla Bypass) bad la iathuh ba katei ka surok, la tei, da kaba shim, da ka ram na ka Japan International Cooperation Agency bad la iathuh shuh shuh, ba kan don kawei ka khyrdop lum khajna, ha kaba yn pynieng ha ka PKG – II, ha ka jaka kaba 22+850 bad ki riew paidbah, ki iathuh ba katei kan dei ha Madan Lyntad, harum Pynursla.

Ha kaba iadei bad ka surok, kaba la jot rathai ha shi lynter, naduh Shillong shaduh Dawki, la iathuh ba la aiti ha ka M/S Tanor Engineering, ba kan maramot ia ki bynta jong ka PKG – I, PKG – III (Pynursla Bypass) bad ka PKG – V, ha ka jinglut kaba T.5.80klur.
Ka RTI, ka iathuh shuh shuh, ba ka surok kaba naduh 81.740 haduh 93.490 KM, yn pynkylla sha ka 4 lane lane kaba la ai jingkhein 0.00 haduh 10.670KM, lane ka package – 1, kaba la aiti sha ka SS Infrazone Pvt Ltd bad ka dor jong katei ka projek, ka long 91.26/351.12 klur bad ka por ba la buh ban pyndep, ka dei ha ka 13tarik Nohprah 2022.

Ka surok 2lane na 10.670 haduh ha 37.550 KM, lane ka Package – II, la aiti ha ka ARSS Infratructure Pvt Ltd ha ka dor 210/526.68 klur bad ka por, ba la buh ba kin trei pyndep, ka dei ha ka 26tarik Nohprah 2022; nangta ka surok 2 lane, kaba dei ruh ban tei ia ka jingkieng Dawki, na 131+820 shaduh 151+330 KM, package IV, la pyntrei da ka SS Infrazone PVt Ltd, ha ka dor 88.2/445.51klur bad ka por ban pyndep, ka dei ha ka 13tarik Nohprah 2022 bad nangta ka surok 2 lane, ba kynthup ruh ia ka jingkieng Dawki, kaba na ka 63+530 shaduh ka 71+520KM lane ka package V, la aiti ha ka Niran Cement Structural Limited, ha ka dor kaba 141.14/284.21 klur bad la buh por, ban pyndep, ha ka 28tarik Nohprah 2022.