Kane ka sorkar kam neh shirta, kin sa mih ki sorkar ban pyntreikam ILP: KSU

Shillong,15 Jymmang:
“Kane ka sorkar kan ym lah ban neh baroh shirta, kin sa mih ki sorkar ka ban lah ban pyntreikam ia ka Inner Line Permit” ong u President ka KSU u samla Daniel Khyriem, haba kren sha ki nongthohkhubor hadien ba la wai ka General Executive Council ka KSU kaba la long mynta ka sngi ha Khasi National dorbar Hall ha Mawkhar.
U President ka KSU u la ong ba ka KSU kam pat kynran dien na ka jingdawa ILP, hynrei katba nang ia khih ILP ki sengbhalang kin pyntreikam shuwa da kawei pat ka ain kaba ym pat jer kyrteng haduh mynta , “Hynrei ka jingiakhih ILP kan iaid beit shakhmat” ong u samla Daniel ha ryngkat ka jingiadonlang kiwei pat ki para nongialam jong ka seng KSU.
Shuh shuh u samla Daniel u la ong ba kumba ka long mynta ki sengbhalang ki la shu ai jingmut ia ka sorkar ban pyntreikam da kata ka ain kaba kim pat jer kyrteng , namarba ka la donkam kyrkieh ban khang ia ka jingwan tuid kyrthep u mynder sha kane ka jylla. Ha kaba ia dei bad ka ILP u la ong ba ka dei ka mat kaba  la ia khih la slem hynrei na ka liang kane ka sorkar kaba mynta kaba la ialam da u Dr.Mukul Sangma ka la kren shai  ba kam lah ban pyntreikam ia ka ILP da kaba kdew  ba ka dei ka kam ba hap ban rah sha ka Ing dorbar bah ka ri ka Parliament , ka la ai daw ruh ba kan pynthut ia ka roi ka par ka jylla bad kan ktah ia ka kam jngohkai pyrthei, ong u President ka KSU.
Halor kitei ki jingkren kiba u President ka KSU u samla Daniel u ba la ong ba kin don kiwei pat ki sorkar kiba lah ban pyntreikam ILP bad ym ba kane ka juh ka sorkar kan neh shirta, ka la mih ka jingkylli ba hato na ka liang ki seng bhalang ki la kubur mo ba ki la rem ne ki la pyyndem noh  ha ka sorkar?.
Lah ban kdew ba ha katei ka GEC kaba la long mynta ka sngi kaba jan baroh ki nongkitkam jong ki unit bapher bapher ka KSU ki la poi lut , ka KSU ka la ia kren ruh halor kiwei pat ki mat ka jingpynskhem ia ka jingpyrshah ka West bad South West Khasi Hills ia ka jingthmu ka sorkar ban thaw jaka rieh tngen ia ki lehnoh ANVC-B,  ka jingpynlong ia ka Entrance Exam MBBS, ki jingiakren shaphang ki jingeh ha khappud bad ka Assam ha kaba ka seng ka la dawa ban buh Out Post ha khappud ban iada ia ki paidbah ba shong ha kito ki thain, ka la pyrshah ruh ia ka jingweng ia ka out Post Kyrshai bad kiwei.