“Kane ka sorkar ka synshar da kaba jah burom”

Shillong, 22 Nailur:
Hadien ba ka sorkar MUA-II ba ialam da u Dr Mukul Sangma ka la jop ia ka jingbymshaniah shuh ba la wanrah da ka Liangpyrshah, u Bah Bindo M Lanong uba dei ruh u Symbud Myntri Rangbah barim ka jylla, u la ong ba kane ka sorkar ka synshar da kaba jah burom.
Haba kren sha ki nongthoh khubor hynne ka sngi, u Bah Bindo u la ong ba ka jingweng noh ka Liangpyrshah ia ka jingiatynjuh ia ka sorkar, kam dei ka sien kaba nyngkong bad kum kane ka jingjia, ka la jia teng ha ki por mynshwa ruh.
“Ka jingweng noh ia ka Jingbymshaniah shuh ia kane ka sorkar, ka dei namar bym biang khlieh briew”, la ong u Bah Bindo bad bynrap, hynrei ka jingrah ia ka jingbymshaniah ka dei ban thad madan ia ki kam bymler kane ka sorkar.
“Ka sorkar ka la jop namar ba ka don ki khlieh briew hynrei ka synshar da ka jingjah burom”, la ong u Bah Bindo.
“Ka sorkar ka bym lah ban weng ia ki jingeh jong ki paidbah kam don hok ban synshar hynrei tang namar ba ka don ki number, ka synshar da ka jingjah burom”, la ong u Bah Bindo.
Katkum ka jingong jong u Bah Bindo kane ka sorkar kam don ka jingiatip lem ban synshar namar ba kam lah ban weng ia ki jingeh jong ki paidbah.
Lah ban kdew ba ka liangpyrshah kynthup ia ka UDP, HSPDP bad NPP ka la weng noh ia ka jingiatynjuh bor ha ka iing dorbar thawain ba dang shu dep hadien ba ka la jah lut ki briew ne ba bun ki ksan rympei rem dorbar, ynda la dei ka por ban ia tynjuh bor hapoh ka iing dorbar thawain.
Ka la weng ruh ia ka jingiatynjuh pyrshah ia u Lamphang ka iing dorbar u AT Mondal uba dei u nongsynran ba hakhmat eh jong u Myntri Rangbah u Dr Mukul Sangma.