Kane ka dei ka ri jong ngi, kiwei ki dei ban burom ia ngi:Adelbert

Shillong, 19 Risaw:
U bah Adelbert Nongrum MDC ka KHNAM na Jaiaw konstitwensi, u la wanrah da ka Resolution hapoh ing dorbar ka KHADC ba dei ban pynbeit thymmai noh ia ka Rules 128 of Assam and Meghalaya Autonomous District ( Constitution of District Council) Rules 1951 kaba la ong ba uno uno u nong India uba la kynjoh sha ka 18 snem karta shajrong u lah ban ia khun elekshon bad u lah ruh ban thep vote ha ki elekshon ka District Council. U bah Adelbert u la ong ba katei ka ktah ia ka jaitbynriew Khasi bad dei ban pynbeit thymmai noh ban ym ailad ia kiwei pat ki jaitbynriew ba kin shim kabu na katei ka aiñ.
U la ong ba ha District Council ka ri Lum Garo mynta ki don 2 ngut ki MDC bar jylla “ym lah hangne ruh ka lah ban jia ha kano kano ka por” u la ong. U la ong ruh ba u la kwah bha ban wanrah ia katei ka mat nadh kham mynshuwa hynrei ki don kiba ialam bakla ia u ban ong ba katei ka mat kaba ktah bha. “Mynshuwa nga la shah pynsngewthuh bakla ba ong ba dei ka mat kaba ktah bha, hynrei balei ngan salia ia kane, kane ka dei ka jong ngi,kiwei ki dei ban burom ia ngi,kiwei kiba tuklar ia ka jaitbynriew jong ngi ki dei ban pyrkhat arsien, ngi la shu thok shu jler ia ki paidbah ban ong phah ia ngi sha District Council ngin ia said na ka bynta ka ri bad ka jaitbynriew, nga pynkynmaw biang ba dei ban pynbeit thymmai noh ia ka Para 128 A” ong u bah Adelbert haba kren ha ing dorbar.
Shuh shuh u bah Adelbert u la ong “Ngi la shah knieh ha ka khaïi pateng, ngi la shah knieh ha ka shongkha shongman, ngim kwah ban shah knieh sa ha ka saiñpyrthei”. Utei u MDC ka Jaiaw u la ong ba u CEM uba dei ruh u Chairman jong ka FOCUSS ( ka kynhun ki district Council ka thain shatei lam mihngi) ba un lum ia ki lai tylli ki ADC ( JHADC bad GHADC) ban trei ia katei ka kam namarba haba tylli lang baroh kan ym don jingeh. “To ngin khylliap ia ka lama jong ka Party, ngin plied ia ka lama jong ka jaitbynriew” u la ong.
Ka kong Teilinia Thangkhiew MDC ka Mylliem ka la kyrshan ia katei ka mat ba la wanrah da u bah Adelbert bad ka la ong ba ha KHADC mynta ka la shu long tang ka rukom leh ba don tang ki Khasi kiba ia khun elekshon, katba ka aiñ pat kam kren ia kata ban leh tang ki Khasi, ka la pynpaw ka jingsngewkhia namarba la shu buhteng ia katei ka kam na kawei ka dorbar sha kawei pat. U CEM bah Pynshngaiñ N Syiem u la kular hapoh ing dorbar ba un pynkloi ia katei ka kam ha kaba un sdang noh ban pyndep ia ki kam hapoh shibnai bad un wanrah ia ki mat ban pynkylla ha kawei pat ka dorbar jong ka KHADC ka ban sa long.