“Kan ym don ka jingot kilo, lada shalan mar rep sha Bangladesh”

Shillong:Kum shibynta ban pynkhlaiñ shuh shuh ïa ka kam khaïi marrep bad ban ïarap ai jingmyntoi ïa ki nongrep ban lait na ka duhnong, na ka daw jong ka jingwan lynshop jong ki bor mariang na ka liang ka Hill Farmers Union (HFU) ka la shim bun ki lynti sienjam haba ïadei bad kane ka kam.

Halor kane ki nongïalam ka seng ki la ïathuh ba hadien ka jingïoh lad ban shimbynta ne attend ïa ka India- Bangladesh Business Conference ha Dhaka la ïoh ban ïakren shibun ki kam haba ïadei bad ka khaïi pateng ne pynïaid ïew ïa ki marrep sha kane ka ri Bangladesh.
“Ka Hill Farmers Union India bad ka Bangladesh Organic manufacture Co.ltd ngi la mynjur ban soi ne sign ïa ka Memorandum of Understanding (MOU). Ngi la ïakut ban shalan (export) ïa u Mar rep na ka jylla jong ngi sha Bangladesh, ïa kane ka jingshalan ne export ïa ki marrep na ka jylla yn leh lyngba ka Cooperative Society kaba la don lypa ïa ka Export license,” ong ka khubor na ka HFU.

Ka seng ki nongrep ka la ong ruh ba ïa mynta ka Cooperative kan phah pynpoi ne sam (supply) ïa u Sying 1no ba dang thymmai (Fresh) bad u Slice Shynrai (slice dry) bad kane ka company na Bangladesh ka la pynpaw ruh ïa ka jingkwah (Expression of Interest) EOI ban ban thied (import) ïa u cashew Sohniamtra sohphan bad ïa baroh ki jhur ba dang thymmai (fresh vegetables).

Shuh shuh na ka liang ka HFU ka la pynpaw ruh da kaba ong, “Bad kane ka jingsupply (Export) ïa baroh ki marrep sha ka Ri Bangladesh. Ngi la pyntikna ba ka jingot kilo kan nym treikam. Ngi kyrmen ba kane ka jingthmu kan long ka jingkyrkhu kaba khraw ïa ki nongrep jong ngi.”