Kamai T.4000, shisngi tang na ka ba die Sohtrun

Shillong, 30 Naitung:
Ka them Ri-Bhoi ka dei ka thain kaba la tip kum kaba shit tam ha kane ka ri khasi Jaintia kham tam ha kane ka aiom lyiur, ka dei ruh ka thain kaba pyniasoh ia ka Shillong bad Guwahati kaba da ki lak tylli ki kali ki ju iaid lynti na katei ka surok bah ha ka shisngi shisngi. Ka Ri-Bhoi ka dei ruh ka thain kaba la tip paidbah kum ka thain ka ri u soh u pai namar katei ka thain ka dei kaba don ia ka khyndew kaba biang tam na ka bynta ki jingthung jingtep khamtam ki kynja soh.
La iohi ba ki paidbah katei ka thain kim shym la pynlehnohei ia ka jingkyrkhu kyrpang kaba ki la ioh ha kaba la iohi ba ha kane ka aiom lyiur ki paidbah nongrep ki la pynmih ia ki soh kiba bun jait bad ki la phriang ha madan ban die sha ki nongleit ki nongwan ba kin bam pynngad ban kham tngen ka met. U soh u ba la die paidbah ha thain Ri Bhoi ha kane ka aiom lyiur khamtam ha kine ki bnai u dei u Sohtrun. La iohi ba ha shi lynter ka rud surok Shillong-Guwahati ki rud surok ki la saw hain da ki Sohtrun kiba ki nongrep ki la wan ban die manla ka sngi da kaba shna tang da i sem ba malu mala tang ban lait shah slap.
Katba dang iaid lynti na katei ka surok bah , u nongthohkhubor u la iohi ba ki kali ki la ieng da u lain ban thied Sohtrun bad la iohi ba kawei ka kali kaba ieng ban thied Sohtrun , kawei pa kawei ka kali kam duna ban thied ia ka san ne hynriew tylli. Haba iohi ia kane u nongthohkhubor u la hiar ban ia kren bad kylli bniah na kitei ki briew kiba die harud surok ia ka iew die Sohtrun.
Haba ia kren bad ar ngut ki longkmie kiba die jingdie harud bah kaba don ha Shang Bangla, ki la iathuh ba ki ju die Sohtrun kumba 15 kuri eiei ha ka shisngi kaba mut 300 tylli ha ka shisngi, haba la kylli katno ka shongdor ka Sohtrun ha ka shi kuri ki la iathuh ba ki don la ki jong ki jait ki don kijba T.350 shi kuri bad ki don pat kiba T.400 tyngka shi kuri, hynrei ka dor jong ka Sohtrun hangtei ka sdang beit na ka T.350 bad tyngkhat ki don kiba T.300 tyngka shi kuri , iathuh kitei ki longkmie.
Haba ia khein ia ka dorT.350 ha ka shisngi ka kamai ba kitei ki longkmie ki kamai na ka die Sohtrun ha ka shisngi ka long T.5250 tyngka bad haba ia khein pat ia ka dor T.400 shi kuri ka long T.6000 tyngka ha ka shisngi. Kitei ki longkmie ki la iathuh ba ki Sohtrun ba ki die ki dei kiba ki kheit hi na ki kper Sohtrun lajong bad don ruh kiba ki shu thied pateng na kiwei pat. Ki la iathuh ruh ba kitei ki sohtrun ki dei kiba la pynmih hi tang na ka them Ri-Bhoi , ym don kiba wanrah na kiwei pat ki jaka.
La kylli biang na kitei ki longkmie kumba katno ha ka shisngi ki ioh kamai tang na kaba die Sohtrun, kim shym la iathuh bad kren shai hynrei ki la ong, “Ban ia kaba leit bylla T.300 tyngka shisngi, ngi dang im shibun ban shong die surok hangne” ong kawei na ki longkmie haba ia kren bad u nongthohkhubor. U nongthohkhubor u la kylli biang hato katei ka kam die Sohtrun jong ki ka dei ba ki trei tang mynta shi aiom ne ki im die jingdie harud surok baroh shisnem , ki la iathuh ba ka kam die Sohtrun ka long tang ar aiom ha ka shisnem, katba ha ki por bym mih Sohtrun pat ki die da kiwei pat ki kynja Soh kum ki sohniamtra bad kiwei.
Lah ban kdew ba ki don bunbah ki longkmie ha ka thain Ri-Bhoi kiba la lah ban bsa ialade tang da kaba shong die jingdie harud surok bad na ka jingkren jong ki la sngewthuh ba ki kamai kumba T.500 tyngka ha ka shisngi, hynrei ki don ruh ki sngi kiba ki iap iew bad don pat ki sngi kiba ki im iew hynrei haba ia khein kyllum ia ka jingioh jong ki ka kot sha ka T.500 tyngka shisngi. La iohi ruh ba nalor ki sohtrun bad kiwei pat ki kynja soh kum u sohphan, soh pyrshong, ki long kmie katei ka thain ki buh lang ruh ha ki dukan jong ki ia ki Ashar ba ki la dep pdem lypa, ki Lung Siej ban kham pynbun mar ha ki sem ba ki shong die jingdie.