Kamai NOC U Syiem Khyrim T. 20 hajar kawei:Pyniaid

Shillong,
24 Rymphang:
U MDC ka Sohryngkham u Bah Pyniaid Sing Syiem u la ong ba u Syiem ka Hima Khyrim u la oh da ka dor kaba rem ia ki paidbah kiba pan No Objection Certificate (NOC) na ka bynta ban pynshisha ia ki jaka jongki.
Haba wanrah mynta ka sngi, ia ka phang kaba iadei bad ka jingai NOC hapoh ka iing dorbar ka KHADC, u Bah Pyniaid u la ong, “Ki briew jong nga na ka thain Sohryngkham kiba hap ha Hima Khyrim, ki la wan ud sha nga namar ba ki la shem jingeh ia kane ka jingleh u Syiem khamtam kiba duk, kiba shem shitom ban siew ia kane ka pisa ban ioh NOC namar ba ki hap siew haduh T.10 haduh T.20 hajar”.
Na ka liang u Bah Pyniaid u la ong ba kane ka jingleh jong u Syiem ka la pyntieng ia ki paidbah ban leit rejister ia ki jaka jongki namar ba kham rem ka dor ban ioh NOC ban ia ka bai jaka ruh.
“Ka EC ka dei ban leh eiei halor kane ka jingleh jong u Syiem, bad lada donkam wat ban bishar bniah ia ka Sanad ia u Syiem bad ban shna da ki kyndon ba tyngeh khnang ba un nym lah ban shim katba mon”, la ong  u Bah Pyniaid.
U la ong ba kum kane ka jingjia kaba ki paidbah ki iakynduh jingeh ka dei ha ka thain Raid Tynring, Mawpdang, kiba ka sorkar jylla lyngba ka tnad MUDA ka la thmu ban shim jaka paidbah kumba 2000 akar.
Ia kane ka phang ba la wanrah da u Bah Pyniaid la kyrshan da kiwei ki dkhot ka iing kynthup u Bah Mansturdy Nongrem, Bah JM Tynsong, Bah Pynshngain Syiem, u Bah Antonio War.
Na ka liang u EM ba peit ia ka khyndew u Bah Morningstar Mawsor u la kubar ba ka EC kan bishar bniah ia kane ka mat kaba la wanrah da u Bah Pyniaid bad ban pan jingshai wat na u Syiem ka Hima Khyrim.