Kamai ka Punjab National Bank haduh T.278.66klur, na ka kuna, na ki nongbuh account baduk

Ka Punjab National Bank (PNB), ka la ioh kamai haduhT. 278.66 klur, kaba dei ka kuna, kaba ka shim na ka bynta u snem 2018-19, na kito ki nongbuh account kiba duk bad ki bym don pisa ban buh ia ka pisa ba rit duh ha bank lane ka minimum balance.

Kane ka long katba kum ka jingwad jingtip, U Chandrashekhar Gaur, uba na Madhya Pradesh jong ka Neemuch district, ula wad jingtip, ia ka jingioh lum pisa jong ka PNB, na ki nong kynshew pisa ha ka, ha ki ar snem ba ladep, namar ba kim don pisa ban buh katba kum ka jing donkam ka Bank. La iathuh ba katei ka pisa, kaba ki la ioh lum, ka dei na ki 1klur 27lak ngut ki nongbuh pisa ha katei ka Bank ha kylleng ka India.

La iathuh ba katei ka T.278.66klur, ka dei kaba nang kiew haduh 32 percent, na ka jingioh kaba katei ka Bank, ka ioh ha u snem 2017-18.