Kamai jem ki bar jylla ha Polo khlem License,pynlong jaka thiah jaka dem ruh hapoh ki dukan

Shillong 8 Naitung: Ka seng Federation of Khasi Jaintia and Garo People (FKJGP) mynta ka sngi nyngkong ka 8 tarik Naitung 2024, ka la leit ban khynra ia ki dukan bar jylla ha ka thain Polo, ha ka ba ki la shu kamai sahuh bad kamai ei khlem da don ki kot ki sla ki ba biang.

Ha Kane ka jingkhynra ka seng ka la lap Ia bun tylli ki dukan ki bym biang ki kot ki sla bad ka seng ka la lap ruh, ba kitei ki bar jylla ki la pynlong jaka sah jaka dem hapoh kitei ki dukan.

Ka seng ka la lap ia ki dukan bar jylla, ba die ia kiba bun ki mar ki mata, ba kynthup ki dukan ba die ia ki tiar iing, dukan bam, ki dukan kyiad, bad kiwei kiwei de ki jait dukan, ha ka ba ki shu shong beain khlem da biang ki kot ki sla.

Kumta ka seng mardor ka la phah khang shisyndon ia kitei ki dukan bar jylla, bad ong ruh, ba kin pynbiang shwa ia ki kot ki sla, ba kin lah ban wan plie biang Ia ki dukan jongki.

“La sakhi ruh ba katba ka seng, ki bor pulit bad ki ophisar ki dang iaid ban khynra ia ki dukan, ki bar jylla ki la kloi ban khang noh da ki tala namar ba ki sngewthuh ba kim don Ia ki kot ki sla ki ba biang, bad ruh la lap ba ki dukan bam ki long ki ba jaboh bad i saitmet ban peit.

Ha Kane ka leit ban khynra ka seng, la wan ban synranlang da ki bor pulit, ki Magistrate, ki ophisar ka Muda, ki ophisar jong ka tnad Labour bad nakaliang ka Tnad Food and Safety.

Ha ka jingiakren bad ki lad pathai khubor nakaliang u bah Khrawkupar Nongsiej u ba bat kum u Chief Organizing Secretary ka seng FKJGP, u la ong ba ka seng man kapor kam ju shong thaid ban khynra ia ki dukan bar jylla ba wan shong kamai ei khlem da pynbiang ki kot ki sla.

Shuh shuh u la ong ruh, ba ka seng kan sa nangiai buddien ban khynra ia ki dukan jong ki bar jylla baroh, bad ba lada ki kwah ban kamai ki hap ban pynbiang shwa ki kot ki sla bad lada kim pat pynbiang ia ki kot ki sla kim dei ban wan plie Ia kine ki dukan.