Kam U Ahmed, ba teh ia ka khmat jong u bad bret sha Shillong

Shillong, 15 Jymmang:
U Asst. Office Secretary ka BNP u Abdul Latif Jony mynhynnin ka miet u la poi ha nongbah Shillong ban wan jngoh ia uwei u para nongialam jong katei ka seng u ba la wan poi wir sha nongbah Shillong u Salahuddin Ahmed,ha kaba u la ia kynduh ia u ha ka jaka sumar ia u ha Civil Hospital, Shillong. Haba kren bad kawei na ki lad pathai khubor, ka BBC Bangla ha nongbah Shillong u Jony u la kam ba u Salahu ddin u la ujor ha u ba ka rukom sumar kam biang ha Civil Hospital, Shil long ka jaka ba la phah sumar ia u.
U Ahmed uba la jah rngai la ar bnai eiei, la lap ia u na nongbah Shillong ha ka lah sngi u blei bad la tang mar ia iohkem la pynkit ia u sha jaka sumar ia ki ba don jingduna bor pyrkhat hynrei kham ha dien la kynriah pat sha Civil Hospital, Shillong hapoh ka ingpeit ki pulit. La phah ia u Jony uba dei u nongialam ba rangbah duh katei ka seng ban wan sha nongbah Shillong da ka Chairperson ka BNP ka Khaleda Zia bad kumjuh ruh la bthah da ki bahaing hasem jong u Salahuddin. “U la poi ha nongbah Shillong ha ka sngi balang da ka liengsuin bad u la iakynduh ia u Salahuddin ha ka miet sngi palei” ong kiba ha ing ha sem u Salahuddin haba ia kren ha Dhaka bad ki lad khubor. 2 ngut ki bahaing hasem jong utei u nongialam ka BNP ki la ia kynduh ia u ha phatok pulit kaba don ha Civil Hospital, Shillong.
Katkum ka jingtohkit ki tnad syntiat ki pulit ka nongbah Shillong pat ki la iathuh u Salahuddin u la phla ba la bret ia u da ki runar sha nongbah Shillong. Ki tyllong khubor na katei ka tnad ki la ong ba u Salahuddin u la phla ba la wan kit ia u sha ki khappud ka India bad Bangladesh da kawei ka kali bad hadien kata la pynkynriah sha kawei pat ka kali hapoh u pud u sam ka India bad ha katei ka por la teh jain ia ki khmat jong u bad ka kali ka la iaid kumba 3 kynta shiteng.
Hadien katei u la ong ba la bret ia u ha kawei ka jaka ha ki thain ka Golflink kaba u lah ban ithuh na ki sign Board ba u la pule, ki tnad syntiat ki la tohkit 2 kyna ia utei u heh ka BNP ha Civil Hospital, Shillong ha kaba u dang shah sumar na ka jingpang khyllai bad kiwei pat ki jingpang kpoh. Ki pulit kim shym la lah ban leit rah ia u Ahmed sha kashari namar ba ba ki doktor kim pat pyllait ia u, la pynngat ia u hapoh ki kyndon ain jong ka Foreigners’ Act namar ka jingioh rung jong u sha India khlem ki kot ki sla kiba biang.
Ki ba ha ing ki la kam ba ym dei ba la kem ia u Ahmed hynrei u la leit hi sha Police Station, ki khubor ki la iathuh ba ka lok jong u kan poi shen hangne ha nongbah Shillong tang mar ia ioh Visa, katba ki nongthohkhubor ka ri Bangladesh pat ki la poi hangne ha nongbah Shillong ban wad jingtip shaphang u Salahuddin.