Kam trai U CEM ka Karbi Anglong ia ka Jri Kyndeng

Bah Monarch Shabong

Kumba ka la paw bha ha ki kotkhubor, ha ki khyndiat taiew ba ladep; ngi iohi, ba U Chief Executive Member jong ka Karbi Anglong, ula kwah ban nang pynshit shuh ia katei ka mat bad kata, ka long, da kaba u leit jngoh ia ka Jri Kyndeng ha ka Sngi Saitjain, ha kaba u da kam trai ba katei ka jaka, ka hap ha u pud u sam jong ka Karbi Anglong District Council bad ba u da pyni, ba katei ka jaka ka hap ha ka Council, naduh u snem 1951.
Katei ka mat te ka la jyrsih shi katdei ha kine ki sngi bad ka jing shisha, ka long ba uba kham stad ktien, lane uba kham nud, ula nang leh katba u sngew iahap bad u sngew mon, katba uba kham tip sngi, la une uba kham tieng eit, ula nang kynran shadien ialade.
Lada ka Assam, ka kren ia u pud u sam jong ka Meghalaya, khlem pep, kan hap ban sngewthuh shai ba baroh kawei ka Ri Khasi Jaintia bad ka Garo Hills, ka la hap lypa hapoh jong ka Assam ha shwa jong ka jingioh ia ka United Khasi Jaintia District Council ha u snem 1952 lane ha shwa ka jingioh ia ka Meghalaya, ha u snem 1972.
Hynrei halor katei ka mat, ngi dei pat ban sngewthuh ba ha shwa jong u snem 1947-48 (bad wat hadien), ba kitei ki jaka puta, ki hap hapoh ka jingpeit jong ki Syiem Khasi, ki Dolloi bad kiwei de ki bor bad lada iakren ia ka jinglong trai ia ki jaka, ngi hap ban iit ia ka tynrai bah bad katei ka long ba mano ba long trai ia katei ka jaka bad mano ba shong ha kitei ki shnong bad nangta sa kumno pat ka mih ka kyrteng bad lada ka dei ka kyrteng Khasi, ne ka dei ka kyrteng Assamese.
Ka jingiakren pynshit ia u pud u sam jong ka Assam bad ka Meghalaya, ka long tang ka kam thombor bad ka jingthmu ban shu leh jubor justi, hynrei ka jingioh jong ka Meghalaya, ia la ka jong ka Jylla, ka wan halor ka nongrim, kaba ki ong ka Jylla rilum lane kaba mut ba ki riewlum, kin hap ha u pud u sam jong katei ka Jylla bad haba ka long kumta, ka tynrai, kam dei tang ia ki ain, hynrei ka dei ban long ruh ia ka thymmei, kaba la don lypa bad kaba ngin hap ban tih tynrai, hapdeng ki snem 1947 bad ter ter, haduh ka jingwan ka Jylla Meghalaya.