Kam trai ka LABDC ïa ki Shnong Khasi bad Garo ha Langpih

Shillong:Ka Lampi Anchalik Border Development Committee (LABDC), kaba dei ka seng jong ki Nepali, ka la kam long trai ïa ki khathynriew tylli ki shnong Khasi bad Garo kiba hab hapoh ka Langpih Sector.
Kane ka seng ki Nepali kaba ïadonlang bad ki Heh ka Sorkar Assam, ka la phah ruh da ka jingthoh bad ka map sha u Myntri Rangbah ka Jylla Assam u Himanta Biswa Sarma, ban pynskhem ïa ka hok longtrai ïa kine ki shnong jong ka Langpih Sector.

Kine ki Shnong kiba ka LABDC ka kam trai ki kynthup ïa ka Hahim, Kampaduli, Bangjeng, Nawapara, Dronpara, Sohmarang, Nongma kaba ki khot ka Panbaripahar, Lower Lampi, Umtap, Lawbah (Harshanagar), Umali (Umwali), Umsing (Uwahsiang), Makoibari, Mawlan kaba ki khot (Katapara), Mawsikar kaba ki khot Upper Lumpi, bad ka shnong Umbarot kaba la tip kum ka shnong Umbyrsit.
Kane ka seng ka la byrngem ruh ban pynlong ïa ka jingïakhih kaba jur ha Assam lada ka Sorkar Assam ka pynphai ïa kine ki shnong sha ka Jylla Meghalaya.

Kane ka seng ki Nepali ka la ïeng skhem ruh halor ki jingtei jong ka Sorkar Assam kiba don ha kane ka thaiñ kiba kynthup ïa ka Lower Lumpi Police Border Outpost, ka Upper Lumpi Police Border Outpost, ka surok rong na Kampahduli sha Mawsikar (Upper Lumpi) bad kiwei kiwei.

Ki paidbah ka thaiñ Langpih, kila bynñiaw jur halor ka jingmih jong kane ka seng ki Nepali bad khamtam eh ïa ka jingkam trai ïa kine ki khathynriew tylli ki Shnong haba dawa ïa ka Sorkar Jylla ba kam dei satia ban sngap ïa kane ka seng bad ban ïakren ruh bad ka Sorkar Assam ba kam dei ban pynlong kongsan ïa ka.