Kam shym don ka jing bakla, ha ka jing tangjait, ia ki 5 jait, ong U CEM

Shillong:U Chief Executive member (CEM) jong ka Khasi Hills Autonomous District Council u bah Titosstarwell Chyne u la ong ba kam shym don kano kano ka jingleh bakla, ha kaba iadei bad ka tang jait ia ki san tylli ki jait, kumba la pynpaw da ka seng Hynniewtrep Youth Council, Sohiong Circle.

Haba iakren bad ki lad pathai khubor na ka liang u CEM ka KHADC, u la iathuh ba ka jingbakla ka long ba ka ophis Public Information Officer (PIO) kam shym la ai lut ia ki kot ki sla sha ka seng HYC Sohiong.
Ka seng HYC Sohing Circle hapoh ka jingialam jong u bah Purningstar Shabong, ki la buh ia ka jingujor halor ka Tang jait ia ki san tylli ki jait bad ha kane ka jingiakynduh u la kular ia ki dkhot ka seng ban sa shim khia ia kane ka kam.

U bah Chyne u la iathuh ba namar ka dei ka kam kaba kyrkhieh na ka liang jong u, kum u CEM u la bthah ia ki ophisar ba kin pynioh ia ki kot ki sla kiba ia dei bad kane ka kam hapoh shi taiew ban lap ia ki jingshisha, hynrei ka seng HYC ka la da pynmih noh ha ki lad pathai khubor ha kaba ka la wanrah ia ka jingkynthoh ia ki EC barim bad ia u phadar Sngi (bam kwai ha dwar u Blei).
U CEM u la ong ba ki Executive Committee kiba la leit noh kim shem la leh bakla, ha kaba tang ia ki san tylli ki jaid, ki la bud ia ki kyndon jong ka ain kaba ka KHADC ka don, ha ka juh ka por ym lah ban ong ba ka jingkam jong ka HYC kat kum ka jinglap na ki RTI ki khlem bakla.

Haba la wat bniah na ki file, la shem ba ka jingtang jaid ki san jaid ka long katkum ka kyndon ain ha kaba u kpa dei u khasi bad ka kmie kim dei ka khasi, ka jingbakla hangne ruh ka long ha ka por ba pyndap ia ka phom khlem pyndap ia ka kyrteng bad jait u kpa wat la ka la don ha ka aplikeshon.
Ka jingtang jaid ia ka Alisha Khardoh u kpa dei u bah Phlestar Lyngdoh, ka kmie ka dei ka Nijara Rajbongshi, Mawlai Umjaiur, ka jingtang jaid ia ka Giyanca V Kharheli u kpa dei bah Helius Khorkongor bad ka kmie ka dei ka Suba Mery Biswa na Mawshabuit Nongrim.

Ka jingtang jaid ia ka Derise Davia Kharlongngap, u kpa dei u bah Wallambor Mylliemngap bad ka kmie ka dei ka Neetu Longkumer na Cleve Colony, ka jingtang jaid ia u bah W. K. Marwein u kpa dei u bah N. Marwein bad ka ka kmie dei ka Uma Chetrri na Nongjri, ka jingtang jaid ia ka Juliana Kharliiu u kpa dei u bah Liiu Pathaw bad ka kmie ka dei ka Marureth Ainp.Halor kane ka jingdon ka jingia bakla na ka liang jong u CEM jong ka KHADC u kyntu ia ka seng HYC bad kum juh ia CEM barim ba kin ia pynbeit ia kane ban nym ia thew, namar na ka liang jong ka EC ha kato ka por shym la leh bakla.

Ha ka juh ka por ka HYC ruh ka kren kumba la lap na ka RTI, namar kim shym ioh lut ia ki kot na ophis jong u PIO bad ha ka juh ka ka don ka jingbakla ha kaba pyndap ia ki phom namar kam shym long kumba la thoh ha ki aplikeshon.

Ha kaba ia dei bad kane ka jingbakla, kaba la wanrah ia kane ka jingkynrum kynram na ka liang jong u CEM un khot ia ka jingialang jong ki PIO baroh ban peit ba kum kine kiei kiei kin nym jia shuh ha ki por ban dang wan.