Kam pat long ban weng ia ka korphiw: Lahkmen

Shillong: U Myntri u ba dei peit ia ka kam poh iing jong ka sorkar jylla u Bah Lahkmen Rymbui haba ia kren bad ki lad pathai khubor, u la pynpaw ba ka sorkar jylla ka don ka jingsngew khia ha kaba ia dei bad ki jingeh ka ba ki paidbah nongshong shong ki mad ha kine ki sngi bad ka dei ruh ka kamram jong ka sorkar ban peit ba kano kano ka jingeh ba kan long tang shipor.

U la ong ruh ba dei na ki jingtip kiba ka sorkar ka ioh, kam pat long ban weng ia ka korphiw na ki katto katne ki bynta jong ka Shillong bad ka sorkar ka shong ban bishar bniah na ka por sha ka por, namar ka kam ka ba ha khmat eh jong ka sorkar ka long ban pynneh ia ka shong suk shong sain ha ka jylla,

U Ma Lakmen u la iathuh ruh ba ar sien shisngi u ju khot ban ia kren halor ka jinglong jongmanjong ka jylla bad na ka liang jong ka sorkar kan shim ia baroh ki lad ki lynti ban pynthikna ba ki paidbah jong ka jylla kin ym ia kynduh ia ki jingeh.

U Symbud myntri rangbah u bah Prestone Tynsong u la ong, nalor kaei kaba u myntri kam poh iing u la kren, ka sorkar Meghalaya Democratic Alliance (MDA) baroh kawei ki sngewsih ban iohi ia kum kine ki jingjia bad khamtam ia ki jingeh ki ba ki nongrep ki ia kynduh ha ka ba ki hap ban die ia ki mar rep ha surok, hynrei u la kyrpad ia ki paidbah ba kin iai shah shipor.