Kam long ban leh shongshit sha khappud, haba ym tip ia ka dang ka duh, ong ka RBYF

Nongpoh:Haba kren sha ki dkhot ha ka jingialang ban pynthymmai ia ki nongkit kam ba thymmai ka Patharkhmah Circle, u Bah Bipul Thang khiew, President rang bah ka RBYF Seng kmie, u la sneng ia ki nongkitkam jong katei ka thain, ba kim dei ban leit mushlia bastad ha kito ki shnong khappud haba kim tip ia ka dang ka duh, hynrei haba thmu ban shim ia kano kano ka mat, dei ban da wad bniah bin-pa-bin bad ym dei ban shu leit leh shongsit.

Haba phim tip ia ka dang ka duh, nai leit ban pynshit ha kito ki shnong khappud, namar kam don jingmut ba phin shu leit leh shongshit ha ki shnong khappud, kaba sah iakhleh hapdeng ki paid Khasi lem bad kiwei de ki jaid bynriew, namar lada shu leit ban leh shongsit ki Seng tang ha ki katto katne kynta, ka jingeh yn mad da kito hi ki paradoh para snam kiba sah ha ki shnong khappud, la bynrap u Bah Bipul Thangkhiew.

Shuh shuh, u Bah Bipul Thangkhiew, u la ong ruh ba long kaba suk eh ia kano kano ka Seng ban shu leit jurip ne leit ban leh shongsit sha ki shnong Khasi kiba don ha Khappud, da kaba kam ba ki leit jngoh ia la ki jong ki paradoh para snam, hynrei halor kata dei ban don u pud bad haba thmu ban shim ia kano kano ka sienjam khamtam ha ki shnong khappud, dei ban pyrkhat bun bun sien, namar ioh lehse kan ktah kylla pynban ia ki briew lajong kiba sah ha ki shnong khappud.
Utei u Nongialam ba rangbahka RBYF, u la ong ba lada ki dkhot ka Seng kin leit pynpaw ia kata ka jingkhlain ha ki khappud, lehse ha ka por kaba ki leit da ki spah ngut kin lah ban pyni ia kata ka jingkhlain jong ki, hynrei ban leit pyni bor tang da ki khyndiat kynta, nangta pat sa wanphai noh sha iing kam da don jingmut, namar ki paidbah kiba sah ha khappud kin nang jynjar ar-shah.

Namarkata, kum u nongialam ba rangbah ka Seng, nga kyntu iaphi ki dkhot ba phim dei ban bam ja khluid ia kano kano ka mat, khamtam eh haba iadei bad ki kam khappud, namar lada ki dkhot ka Seng ki leit ban leh shongsit ha ki shnong khappud, ka jingeh kaba kham palat yn mad da ki paidbah kiba sah ha kiba kum kitei ki shnong.