New York: Ka International Court of Justice (ICJ), hynnin ka sngi, ka la bthah ia ka Russia, ba kan sangeh shi syndon ia ka jingleit hiar thma jong ka ia ka Ukraine, kaba la sdang naduh ka 24tarik Rymphang 2022.
Na ka liang U Joe Biden, uba dei U President ka USA, ula kynnoh ba U Vladimir Putin, u dei u nong pyniap briew bad na ka liang ka Kremlin, ka sngew pyrshah jur ia katei ka jingkynnoh jong U Putin, da kaba ka ong, ba katei ka jingkren, ka long kaba kim lah ban pdiang bad kaba kim lah ruh ban map.
Ka US, haduh mynta ka kam, ba ki don 7hajar ngut ki shipai jong ka Russia, kiba la shah pyniap ha ka jing ialeh thma ha Ukraine bad sa 21 hajar ngut kiba la mynsaw jur, katba kum ka khubor jong ka New York Times. Lyngba katei ka jingkhein, ka pyni, ba ki don 1 bynta na ka san bynta jong ki shipai ka Russia lane kiba don baroh 1,50,000 ngut, ba kim lah shuh ban ialeh thma, na kane ka thma, kaba la iaid mynta la 22 sngi kynthih.
Ka Ukraine, ka la aiti ia 9ngut ki shipai jong ka Russia, da ka jing ia kylliang bad ka jing pyllait noh ia U Major jong ka Melitopol, ong ka khubor jong ka sorkar Ukraine.
La iathuh ba ki don mynta 2,400ngut ki riew paidbah kiba iap ha ka nongbah Mariupol, jong ka Ukraine. Ym don ding ilektrik, ym don um bad ym don lyer shet jingshet, mynta la 13 sngi kynthih, ha katei ka nongbah, ha kaba ka jingkhriat ka long -5°C ha ka por mynmiet. Haduh mynta, ki dang don sa 4lak ngut ki briew kiba shong ba sah ha katei ka nongbah.
Phi don ban ong eiei?